Exchange Guide

就嚟Sembreak啦！相信大家都開始睇緊平機票，plan緊同啲朋友一齊出國玩下！不過有啲朋友可能識咗好多年，睇落好似好夾，點知一去旅行就見真章，「伏」到想絕交。唔想成為人哋眼中嘅「豬隊友」，不如學下以下5招，等你成為最受歡迎嘅旅伴啦！

1.有時間觀念

好多人覺得係約定時間出現係好基本嘅事，但對住越熟嘅朋友，惰性就會越高，覺得遲少少無乜嘢。係香港預唔好時間都係小事，但如果去到海外旅行，係好多行程已經預訂好嘅情況下，一旦遲到Miss咗行程就好大鑊啦。另外，唔單止要係準時出現，旅行時同朋友一齊住酒店，最好都係先分配好大家沖涼梳洗時間，人人生活習慣唔同，一早傾好晒就唔怕因為爭廁所而鬧交啦！

2.提供有建設嘅意見

正所謂「Ban橋要諗橋」，呢句嘢完全需要套用係旅行個陣。去旅行Plan行程個陣大家都會有唔同諗法，始終係有限時間同有限budget，要一次過滿足大家嘅要求都唔係一件難事。不過切記要俾有建設性嘅意見，Ban橋個陣比埋其他建議就最好，咁樣會慳返好多討論時間之餘，又唔會影響大家嘅感情，未去旅行就冇咗個朋友啦！

3.注意金錢往來

平時出街同人Shopping／食飯，有時都唔好意思問返朋友收返個幾蚊雞，好似好小家咁。不過去旅行嘅時候，始終牽涉嘅費用比較多，例如機票、住宿、保險、甚至租借Wifi蛋等。大家都係學生哥，budget無乜幾多，最好就係list返清楚均真啲好。如果唔係因為少少錢影響友誼，甚至事後比人唱就唔好啦。

4.願意嘗試新事物

難得去到外地，好多時都會需要接觸到好多唔同嘅新事物，例如要挑戰未食過嘅菜式、或者去一啲特別嘅景點。有啲同學仔比較保守，驚會中伏所以好多嘢都唔敢試，但難得去旅行緊係要嘗試啲唔同嘅挑戰，有啲特別經歷先會可以將回憶永遠保留。

5.分工合作有貢獻

一大班人去旅行，有經驗嘅朋友通常都會委配重任負責訂機票酒店編行程等等。不過小編會建議如果大家係第一次同某啲朋友去旅行，最好就分散workload，每人負責一部分，再group埋一齊討論。因為你未必知道朋友執行能力高唔高，可唔可靠，而且你亦都可能會因為Freeride比人記一世，所以最好就人人有啲貢獻，開開心心去旅行啦！