Exchange Guide

相信大家都會Mark實廉航，有平機票就會即刻去搶購。但係不論你搶機票或者買機票定日子，或者定酒店、編行程嘅時候，不如先「停一停，諗一諗」，唔好一頭栽進旅行大計！去旅行最重要係開心，以下就列出5個常見旅行的小意外，喺編訂旅行大計時不妨加入考量？

一、遇上節慶假期，交通問題好麻煩？

旅行地有大型節慶假期，呢個意外算是一個可圈可點嘅問題。你或者會因為該節日而去，例如泰國嘅潑水節；但同時，正因為節慶假期嘅關係，又會遇上景點關門、店鋪休息、特別嘅交通安排等，例如韓國中秋節，當地嘅商店都會休息，又或者不少人都會新年時去旅行，亞洲國家過年時亦有不少店鋪關門，或因為回鄉而導致火車票售罄以及塞車。

二、撞正生理期，尷尷尬尬去旅遊

「大姨媽」確實係令女仔又愛又恨，特別係去旅行嘅時候！除咗會導致身體不適，心浮氣躁之外，去以水上活動為主嘅地方例如泰國、東南亞國家，又即刻玩唔到；或者，去日本、台灣浸溫泉亦會浸唔到。所以，關顧到女性需要，去旅行之前不妨計算自己嘅生理期，以及攜帶止痛藥、貼身用品以備不時之需。

三、天氣變幻難預測

天氣嘅好壞絕對影響一個旅程！當然不少人去旅行之前都會做足功課，查詢當地天氣狀況，但緊記要留意當地天氣特點。例如去當地會否日夜溫差大，或者會否遇上雨季、雪季等等。做好功課密切留意天氣情況，帶齊衣物用品有備無患。

四、機場的位置在何方

呢點對於搭廉航嘅你比較重要，由於不少國家都會有兩個機場，廉航嘅機場有可能在較遠位置。亦千萬要小心和廉航一併訂購嘅酒店，曾經亦有朋友試過沒有留意機場位置，結果酒店及行程都在台中，但機場卻在桃園！相比起要預留去機場嘅時間就多一倍以上，而且也需要計算去機場嘅時間和交通，以免誤班。

五、酒店位置好重要

和機場問題一樣，不少人會因為酒店便宜，或者景觀而選擇酒店。但請在訂購酒店時，先留意酒店嘅位置——到達酒店嘅交通是否方便？夜晚回酒店嘅路程會否太僻靜？酒店附近有什麼設備或商店？需知道酒店可算是第二個家，加上出外旅遊少不免會早出晚歸，所以需要清楚往返是否方便而安全，女生尤其需要注意。就以筆者朋友為例，曾經住過嘅酒店回程時過於僻靜，真的有出現被陌生人尾隨嘅危機！