理財Guide

近年網購盛行，好多人都有透過網上平台買過嘢。網購嗰陣睇到合眼緣嘅嘢，就會有「順手一次過買埋」嘅想法，結果埋單嘅時候就比起原本預算用多咗幾百蚊…… 今次想分享網購慳錢方法俾大家，由今日開始可以預防手多多㩒兩㩒就買多咗！

1. 1. 避免即日下單，逐步篩走不必要商品

有時候購物癮起，突然好想買衫買文具，就會興沖沖咁揀曬心頭好就即刻落單俾錢。 建議大家先將啲想買嘅嘢列成清單，隔一兩日之後再睇多幾次個購物籃，重新評估呢啲商品係咪真係需要買，買咗又係咪會經常用得著，慢慢揀出最需要同最想要嘅商品。
 

2. 2. 早買係早享受，但係遲買會平幾嚿喎！

大家可以多啲留意某啲品牌或者商店會喺咩特定時候減價促銷，例如淘寶有雙十一購物節，歐美品牌會搞Black Friday咁樣。如果計劃想買嘅商品唔係趕住用，大可以等到呢啲時候先落單。但係大家要謹記，唔好因為貪平而瘋狂落單，結果仲洗得多過原本預算呀！

	減價促銷時段
一般網店	季末、週年紀念、節慶期間
淘寶/天貓	雙十一購物節、6.18購物節等
歐美品牌	Black Friday (十一月最後一個週五）、Cyber Monday (Black Friday後的週一）等
蝦皮購物	9.9購物節

 

3. 3. 善用集運服務，或者同人夾單

香港有唔少提供集運服務嘅公司，將你嘅海外訂單喺當地貨倉集合咗再運翻香港，然後按總重量收費， 唔洗逐件貨品俾運費。如果你只係想買一兩件商品，分分鐘運費仲貴過你買嘅嘢，咁就最好搵親朋戚友同你夾單，再攤分郵費，都係唔錯嘅方法。

集運公司	簡介
Buyandship	運費每磅$12起* 集運地區：英國、美國、日本、韓國、澳洲、意大利、中國及台灣 付款方式：八達通、信用卡及現金到付
DimBuy	運費首公斤$11起* 集運地區：英國、美國、日本、中國及台灣 付款方式：八達通、AliPay HK、信用卡、現金到付等
集運王	運費首公斤$10起* 集運地區：內地（淘寶、天貓、京東等） 付款方式：八達通、AliPay HK、信用卡、現金到付、PayPal等

*價錢視乎發貨國家、取貨方式及地點等有所調整
 
網購的確係方便慳時間，而且商品琳琅滿目，好容易就會抵抗唔到魔鬼嘅誘惑。如果知道自己係忍唔到手一族，不妨參考吓上面嘅建議啦！
 

延伸閱讀:

【大學生荀工】9-12月功課輔導班導師(薪酬：$80-100／小時 )

【Media人請入】香港電台兼職節目助理-時薪$74 (05/08/2019截止)

【PR/Marketing 實習機會】秋季 KPMG 實習 – Market Services (Event Team)