理財Guide

某知名網上討論區最近有人討論，究竟大學生嘅身家大約有幾多。見到有人話自己有父幹加持，已經成為咗百萬富翁，令小編葡萄到流曬眼淚。除咗補習同翻part-time賺吓零用錢，究竟冇父幹嘅我哋可以點樣先可以儲多少少錢？

1. 1. 俾心機讀書攞scholarship

呢個年代，讀好書將來唔一定會發達，但係發個小財都可以嘅。尤其而家多咗好多唔同名目嘅獎學金，只要你努力一下過到3.3，肯定會搵到一個半個符合你條件嘅計劃。

如果你一向係學霸，攞開入學獎學金，只要你繼續保持呢個學霸狀態瘋狂renew獎學金，相信你4年入面攞到嘅錢等於免費讀咗個學位。如果你自問係平凡的小學渣，只要今個sem努力啲，可以攞個飛躍進步獎。如果你喺非學術方面都有啲成就，更加可以申請其他睇重課外成就嘅獎學金。

如果要數比較容易攞到嘅獎學金，大家可以嘗試申請呢兩個：

領展第一代大學生獎學金

 

只要你係屋企三代入面唯一一個大學生就可以申請，而且唔一定要俾推薦信，只需要去民政事務處宣誓證明就可以。申請成功之後仲有暑期實習機會㗎！

 

恒生銀行社會服務獎學金

呢個獎學金只要你過去一年成績優異，而且有超過100小時嘅社會服務經驗就可以申請，仲好似冇面試添。參考資料（報名詳情要留意每年各院校發放嘅詳情）

大家只要定時留意mass mail有冇適合嘅獎學金可以申請，再努力過3.3就可以㗎喇！小編祝大家年年袋scholarship袋到盤滿缽滿！

1. 2. 定期存款

如果你已經成功儲到一小筆錢，你可以考慮將積蓄擺去定期存款戶口。定期存款係指你將部分積蓄放喺銀行一段特定時間，期間唔準動用呢筆資金，限期完結之後可以收取利息，利率比起普通放喺戶口要高。呢種投資模式可以話係低風險，唔會蝕本，不過就要凍結你嘅流動資金一段時間。不過要注意嘅係每間銀行做定存嘅最低金額同利率都唔同，大家要仔細比較一下！例如恆生銀行嘅定存計劃最低港幣10,000就可以入場，年利率係2.40%。

1. 3. 月供股票

月供股票比定存風險高，比較適合有基本金融知識，又有少少資金嘅同學仔。月供股票就係每個月投放相同金額去購買股票，你可以同時供多過一隻股票。例如你每月用$5000購買股票A，第一個月嘅股價較低，可以購入50股；隨後一個月股價上升，每股價錢提高，用$5000可以買到30股，兩個月累積持有80股。如此類推，你可以一直累積持股數目，數目越多，公司定期派息嘅時候獲利亦更多。

呢種投資方法可以唔洗花過多時間留意股市（當然都要做吓功課，了解邊種股票值得投資），不過股市始終會波動，投放去買股票嘅金錢都有可能會虧損，大家要衡量自己嘅經濟狀況先好嘗試喇。

 

如果你想學習更多其他學生理財知識，可以閱讀以下精選文章，或者瀏覽我哋嘅理財Guide欄目：

網購搞到你衝動洗多咗？3個方法幫你慳到盡

【學生貸款】信貸評級對你嘅人生有幾重要？

【學生貸款】如何選擇最適合自己的學生貸款計劃？