【逆市賺錢】其實步兵好唔好做？︱ uFinance 大專學生資訊貸款平台

搵工Guide

【逆市賺錢】其實步兵好唔好做？

Marcus Lee | 15/09/2020

而家多咗人叫外賣令「外賣兵」需求大增。如果你因為疫情又冇工返又冇街出日日喺屋企做廢青，係咪同小編一樣都諗過做外賣步兵呢～但其實步兵好唔好做？以下就同大家分析下現時三間主要外賣平台Deliveroo、Foodpanda同UberEats嘅外賣兵待遇！！

首先講講申請做「外賣兵」嘅條件。

Deliveroo：年滿18歲、合法在港工作且擁有一部iPone IOS 11.0或Android 6.0或更新型號嘅智能手機即可。如果有一部電單車或單車及其安全裝備就可以做車手或單車手。

Foodpanda：年滿16歲、合法在港工作且擁有一部iPhone IOS 10.0或Android 5.0或更新型號嘅智能手機即可，有埋部單車同安全裝備仲可以做單車手！（當然，如果要做車手就要滿18歲且有車牌同車啦～）

UberEats：年滿18歲、持有有效香港身分證就可以加入。如果想做車手就需要3號牌（第 3 號車輛類別代號執照資格）同埋車輛嘅登記同保險文件就可以喇～

咁可以點apply呢？其實三間都好方便，全部網上搞掂。

UberEats最簡單，只需要上網登記、填寫所需資料、遞交指定文件，等候幾日審批之後填妥埋銀行資料就可以拎保溫袋開始送餐！Deliveroo同Foodpanda都需要喺網上填完表後interview，並於當日提交所需文件。之後出席有關簡介會或培訓然後領取裝備（制服同保溫袋等）就可以開始～

到大家最關心嘅人工啦，咁三件嘅計法都有啲唔同，以下就羅列晒出嚟～

Deliveroo：可以揀「時薪加送餐費」或「以距離計」兩個方式。「時薪加送餐費」嘅電單車手時薪$55再加$20送餐費、步兵或單車手就$40時薪再加$15送餐費；「以距離計」嘅電單車手就每單最少$50人工、步兵或單車手就每單最少$35人工。所有小費都係外賣兵自己袋落袋，另外仲有啲特別情況嘅bonus。

Foodpanda：一律計時薪同送餐費，電單車手$75時薪加每單$15；步兵或單車手則$40時薪再加每單$15。所有「貼士」都係外賣兵自己落袋。

UberEats：佢哋計法有啲複雜，大概來說步兵或單車手每單收$25至$40；車手每單$50至$70。佢哋設有「路路賞」（即在指定地點，時間內完成不同程數, 即可獲得定額獎金）、「單車手/步兵獎金」（即分取餐費、路程費、交餐費來計薪，以及額外加乘獎金）同其他獎金等嘅bonus。