搵工Guide

唔驚唔覺又到11月尾，好多同學都開始報緊出年嘅Summer Internship Placement同Management Trainee Program。想Interview得心應手，然後快啲拎返幾個好Offer係手的話，不如睇下以下三招Interview絕技，好好備戰真正嘅interview啦！

1．由價值觀入手

雖然係老生常談，但要說服人請你自己必先說服自己，自己先要知自己目標如何、係呢行想點發展、自己價值觀同信念。大公司嘅Interview最鐘意問你where do you see yourself in 5 years啊what do you expect to get in this position啊個啲，呢啲問題，一個唔小心就好容易露咗底。人人都想升官發達，重點係你要包裝呢啲人生觀成為一樣動聽、發人深省、賺人熱淚嘅人生目標，再不停洗自己腦以至即使面試官同你輕鬆閒談你都唔會因放下戒心而講咗啲唔中聽嘅說話。

2．明瞭自己強弱

好好分析自己硬件、軟件有何吸引僱主要請你，硬件如GPA、運用Excel/Powerpoint能力，去到軟件嘅Leadership skills、平時準時與否，再靈活套用這些強弱條件到你工作範疇同職責。順帶一提其中一條僱主最鐘意問你嘅強項弱項，面對呢啲問題當然唔可以照直同人講你自己差係邊，更加不宜將優點當缺點：例如自己最衰太完美個啲。弱項係要答，但可以答啲無傷大雅嘅嘢，例如in IT可以話自己不擅詞令，in HR可以話自己唔叻畫畫。

3．知道Market Trend

除咗事前必起底公司資料甚至interviewer background之外，另一樣重要都係你in個行嘅market trend。即使自己無接觸過、無實際操作經驗都好，只要你噏到個名，都至少可以show到你幾有market sense、對呢行幾有認識同埋至少有心。一間公司請intern/part-time，佢哋都真係唔會expect much，佢哋想要嘅，大慨只係個有心人，你show到你有心、上進，佢哋對你印象好，請你機會都大。

不過，見工尤如相體，有時候拎唔拎到個offer，講緊嘅只係眼緣同命運。
睇埋搵工Guide其他文章，預備好自己可以預備嘅，前一晚早啲瞓，其他就交俾個天啦。