搵工Guide

對於唔少Final Year嘅同學仔嚟講，手執大公司MT offer好似已經贏在起跑線。人工唔愁之餘，之後嘅career path都已經plan好咗，捱完2－3年就可以有機會做中高層，以後都平步青雲。不過其實係唔係人人都啱做Management Trainee呢？如果入唔到大公司嘅MT，究竟去中小企嘅Trainee Program好定直接搵份Gradjob好？想知多少少就睇埋落去啦！

 

入大公司MT Program 有咩好處？

1.) 起薪點比較高
如果你成功得到大公司嘅MT Offer，MT起薪點相對會比大公司Junior Post嘅起薪點高。如果第時諗住轉返出其他公司做，拎住呢份人工出去R好啲offer都易啲啦！

2.) 學習機會較多
MT通常會有機會係唔同部門工作，對於職場新人黎講學習機會算多。除咗可以接觸到唔同部門嘅唔同工作範疇外，仲有機會識到唔同人。如果你對某個部門比較有興趣，想完咗Program之後繼續留係度做的話，就記住好好Mark住你啲senior啦！

3.) 可以享有大公司福利
能夠入大公司工作，當然可以享有大公司應有嘅福利啦，例如較多嘅annual leave、員工優惠同埋員工活動，講俾人知都惹人羨慕啦！

 

如果報名中小企MT Program 有咩要注意？

1.) 做MT定係做打雜
好多中小企為咗吸引Freshgrad報名，都會開設MT／GT Program，等大家以為可以輕鬆做Management。不過其實依家唔少公司都係會「掛羊頭賣狗肉」，Management Trainee其實都係做Sales工作。就算真係俾機會你rotate去唔同部門，都會因為人手短缺而欠缺「Training」部分，或者因為覺得你只係工作幾個月所以唔敢比重任你，而將你當你打雜咁用。如果真係有興趣入中小企做MT嘅話，就記得做好research，多啲了解個Program先apply啦！

2.) Career Path唔清晰
好多人都以為入得MT Program，捱過2年就必定有機會做Management，唔係Manager都會係Assistant Manager啦！不過其實中小企係唔係真係有咁多Managerial Post比人做？而且你完成咗2年Program後，你嘅工作經驗係唔係真係比其他人多？高層又係唔係真係會信任交托重任比你？如果Career Path唔清晰的話，不如一開始直接搵個Junior Post去儲工作經驗喇！

 

究竟我係唔係真係適合做MT？

1.) 習慣經常變嘅工作環境嗎？

MT／GT Program嘅最大特色就係Job Rotation，即係每幾個月就要去唔同部門，接觸唔同工作。如果你自問係一個適應力強、學習能力又快嘅人，做MT一定難唔到你。你可以短時間學到唔同嘢，亦可以擴闊自己眼界，搵到真正啱自己嘅工作。不過如果你係適應能力比較慢嘅人嚟講，做MT Program對你嚟講會比較吃力，唔知啲嘢學得比較慢，如果supervisor覺得你表現未如理想，唔敢交托重任比你的話，你可能接觸嘅工作都只係會比較雞毛蒜皮，對將來冇乜幫助。

2.) 你知道自己適合咩工作嗎？

如果你對於將來嘅工作比較迷茫，MT／GT Program就可以比你係短時間接觸唔同嘢，去搵到自己長處、短處、同埋興趣，咁之後你就唔使迷迷糊糊去搵適合自己嘅Career Path啦。不過如果你已經知道自己擅長係咩地方，例如知道自己性格好I，一定唔可以做Sales／CS的話，就建議直接搵返相對嘅工種，減少因為需要做唔適合自己嘅工作而產生嘅壓力。