搵工Guide

對於職場新人黎講，試用期（Probation）係蜜月期嚟，因為上司都仲係觀察緊你嘅工作表現，所以唔會一下子比好多重任你，或者驚嚇走你，都真係會扮下nice。為咗可以安安全全咁捱過試用期「扶正」，好多Freshgrad bb都會希望搏表現等呢3個月可以無驚無險咁渡過。今次等小編share幾招等你可以輕鬆pass probation啦！（同埋私人醒你幾個probation必定留意嘅細節，如果見到唔對路拿拿聲走人啦！）

 

Probation 必定要有交帶！

雖然返工本身都需要有交帶，但Probation始終都係一個極速俾人留下印象嘅時刻，所以記住無時無刻打醒12分精神。點先為止有交帶？隨時jot低阿姐或者同事同你講嘅notes／task，覆email個陣詳細列明自己做咗咩，再CC埋相關同事保障自己。最緊要係有咩唔明即刻要問，或者唔肯定嘅時候double confirm一下上司自己有無get錯，記住千祈唔好以為啲嘢好容易就自把自為！好多時候，同事或上司會好鍾意係Probation時將新人同「前人」比較，如果你比起「前人」工作表現差太遠，到時唔比你過probation就唔好啦！

 

Probation 必定要遵守規則！

有好多新人啱啱返fulltime，會見到職場有好多同聲同氣後生仔就會變得比較放鬆，遲到早退已經算小事，見到大家買埋早餐返公司慢慢食／lunch食2個鐘就跟機，其實都好容易得罪「老屎忽」架！新人未必知道其他同事同阿姐關係係點，就誤以為阿姐默許全世界chill住返工。不過其實呢啲細節位好影響其他人點樣睇你，萬一你工作未能夠完全上手，又唔係特別守規矩，上司第一個就搵你開刀唔過你Probation就唔好啦！

 

Probation 必定要保障自己！

職場如戰場，雖然身邊嘅同事睇落好nice好熱情，但知人口面不知心。啱啱去到公司你未必知道晒啲人際關係，除咗唔好亂咁靠邊站外，最緊要保障自己。如果有同事叫你做嘢，記得要同自己直屬上司down聲，等佢知道你有嘢忙緊。平時send email記得善用CC function，要將電郵copy埋俾有參與task嘅人，等人知道你有做嘢之餘，防止「食死貓」。同埋所有嘢記得都留返copy，upload返去公司system，咁就可以防止「有心人」陷害啦！

 

Probation後先見真章？

其實Probation唔止係比機會公司去觀察你，亦都係比你去觀察公司嘅機會。如果你「有幸」係頭3個月，或者第一個月已經發現公司伏 ，恭喜你！呢個係個天畀機會你重新選擇，而唔需要過咗probation之後呆坐1個月通知期先辭職。有好多職場新人係probation個陣發現工作未必適合自己，做起上嚟吃力唔開心，或者覺得同事好難相處之類，記得要停一停諗一諗你係唔係真係要係呢間公司繼續做落去，始終返工只係佔你生活一部分，如果影響情緒或者生活就建議真係搵過另一份啦！