搵工Guide

好多人寫cv以為求其上網搵個template抄就冇問題，但係其實喺CV上面都有唔少中伏位要注意。今次我哋集結五個最常犯錯嘅問題等大家可以留意一下。避免他日因為CV上面一啲小小嘅careless mistake而影響interview機會！

 

1. Employment History同Education既order

CV有一樣不成文嘅規定就係由最近既經驗開始寫，等HR可以清晰知道你最近嘅工作係做緊啲乜嘢。有好多人寫Employment History嘅時候知道係應該咁排序，但係到education嘅時候就唔記得咗係應該由最新排到最舊。雖然都係有啲小問題，但係影響觀感就唔好啦。

2. 唔記得check清楚CV既link

越來越多人習慣將自己嘅Portfolio或者LinkedIn擺落去CV到，但係有陣時可能條link已經唔啱，未必link到去正確地方嘅時候，其實都幾令HR反感。所以一定記住如果有擺link落CV既，每次send出去前到順手試一試。

3. 冇留意到 Format走位

HR收到CV第一眼嘅印象就係佢嘅formatting。如果format上面有走位，即使經驗有幾吻合都好，第一眼都已經比人扣咗分。想解決format唔走位嘅問題，大家都習慣save CV嘅時候save返做PDF先send出去。

4. Grammar要分清Present/Past tense

寫CV成日都想用啲好靚嘅英文係拋下書包，但係往往好多人都忽略咗Grammar嘅重要性。Grammar唔需要複雜，但最緊要用得啱！份工係而家做緊嘅用present tense，份工係以前做緊嘅用past tense，其實就係咁簡單。

5. 中英文地址寫法要注意

呢個point係最白痴，但係原來而家都好多人會犯錯。CV上面好多人都會寫屋企地址，但係又冇留意清楚屋企地址有冇用錯format。記住記住記住英文地址係由最細嘅item寫到最大，先寫室，後寫樓，最後先寫地區，中文地址先係調返轉。呢啲嘢如果犯錯其實係好大扣分，因為真係完全係common sense，所以記得Double check多幾次呀！

 

今次講完五個CV最容易中伏嘅位，希望大家自己都有留意清楚有冇踩雷，千祈唔好因為一啲小問題影響到interview機會。