校園Guide

手工啤酒一直好受歡迎，無論酒吧定係超級市場都可以見到佢哋嘅身影，但係Made in Hong Kong嘅手工啤大家又飲過未呢？今日就先為大家介紹5款香港製造嘅手工啤酒牌子啦！

香港城釀

Citibrew HK香港城釀手工啤酒，係以香港作為基地，用亞洲食材同香料入酒，例如花椒、蜂蜜、桂花等，釀出好似你同我喺人生中經歷各種甜酸苦辣嘅啤酒，透過啤酒向世界發聲。而係之前推出咗幾款充滿香港特色嘅手工啤酒—港男、港女、第三者、OT等都好受大家歡迎。

佢地亦都會周不時有手工啤酒工作坊，對於有興趣跟釀酒師學習釀製方法同技巧嘅你，記得留意住佢地嘅Facebook同Instagram啦！

獅子山啤

Lion Rock Brewery 獅子山啤成立喺2015年，以70年代獅子山精神做出發點，創辦人希望從香港人嘅手，製造出屬於香港本土口味嘅啤酒，而推出嘅手工啤酒都係以都係以香港元素命名，好似獅子山下、一代宗師、十年。獅子山啤係無添加劑化學成份，仲會用特色食材釀酒，好似香茅、綠茶、菊花等等。

香港啤酒

廠房位於柴灣嘅香港啤酒公司成立喺1995年，係香港歷史最悠久嘅手工啤酒廠，創辦人採用頂級麥芽、酵母同啤酒花釀酒，希望為大家帶嚟新鮮、濃郁嘅手工啤酒。

佢哋推出嘅啤酒會以本地特色嚟研發，例如之前推出過以生啤形式供應嘅「新界系列」同以桶裝啤酒形式供應既「吉澳系列」咁。

鬼佬啤酒

Gweilo beer 鬼佬啤酒係由3位喺香港居住嘅「鬼佬」2014年創立，當初佢地會借用唔同嘅酒廠去釀製手工啤酒，到2018年終於喺火炭設立一間屬於自己嘅啤酒廠，部份設備更加係亞洲獨有。鬼佬啤酒每個月可以出產40萬罐手工啤酒，嚴謹嘅工序為大家帶嚟高質素嘅手工啤酒，所以曾經仲同Mikkeller (歐洲著名手工啤酒品牌)同香港友 (嘉士伯旗下手工啤酒品牌) 合作過添。

例如佢地曾經推出過一款社交型啤酒，當中加入咗大量啤酒花冷泡，會喺啤酒入邊聞到蜜瓜、柑同埋松脂嘅香味。

黑鳶啤酒

Black Kite Brewery 黑鳶啤酒係由喺香港出世嘅兩兄弟David同Daniel Gallie創立。而黑鳶啤酒係點嚟㗎呢？呢種雀鳥係成日會喺香港嘅摩天大廈到飛翔，所以就用咗為人熟悉嘅鳥類命名啦。佢地會採用世界各地嘅新鮮配料嚟釀酒，例如係水果、茶等等嘅原料，推出一系列經典，同埋期間限定系列。

佢地曾經推出嘅味道都令人覺得好新鮮，好似帶有煙燻味嘅「OH,BACON!」、有朱古力同咖啡香味嘅「PORTER」咁，係唔係即刻都好想買返支嚟試吓呢？