校園Guide

meme成為一種新興嘅網絡文化，起初只係喺討論區、Facebook、Instagram社交平台上運用，作為代表反映現實情況或者心聲，到近期仲伸展到whatsapp stickers，可見meme已經成為咗我地生活一部份。但meme嘅出處你又知幾多？以下10張電影嘅meme，睇吓你地又知幾多？

 

「我全都要」

相信大家絕對唔陌生！出自周星馳1994年嘅電影《九品芝麻官》，徐錦江飾演嘅豹頭喺青樓指着所有女子講「我全都要」！

呢張meme用於有靚女靚仔、感情諮詢等需要選擇嘅話題，意思非常直接，我地可以一律霸道地回覆：

 

「Am I a joke to you?」

呢張meme出自南非一部知名連續劇Generations the Legacy，meme中由南非演員Rapulana Seiphemo飾演嘅Tau Mogale十分無奈又帶住悲傷嘅神情講出「Am I a joke to you?」。

meme會應用喺一啲荒謬嘅情況，突出自己慘成一個笑話。

 

「食屎啦你」

張學友經典嘅「食屎啦你」成為香港影史上其中一句經典台詞，奇怪嘅係無乜人知道呢一幕嘅出處，亦唔知道張學友喺戲中個角色。《旺角卡門》嘅故事背景係六十年代嘅香港黑社會，飾演成日闖禍嘅古惑仔烏蠅，同同一個社團嘅兄弟互相挑釁，就講出呢句。呢個角色為張學友帶來香港電影金像獎最佳男配角。

 

父子嗌交

出自美國電視真人show《超炫美式機車》（American Chopper）第6季第1集嘅畫面，老豆Paul Teutul Sr 同對個仔Paul Teutul Jr. 提出佢遲到問題，兩人展開激烈嗌交，最後不歡而散。

當時節目喺2009年播出，直至2018 年先開始喺Twitter 傳播！呢個meme用法係將對白更改成自己嘅version，後續被網友用以嘲諷。

「First time?」

出自於柯恩兄弟（Coen brothers）2008年嘅電影《細說當年話西部》（The Ballad of Buster Scruggs）。全片由六個故事組成，背景係美國邊界嘅西部故事。呢個meme就是出自其中最能表現到冷幽默嘅Near Algodones。呢一幕係主角被駕禍而上咗城鎮嘅公開絞刑台，當佢睇到隔離準備一齊行刑嘅犯人嚇到打晒冷顫，就自嘲咁問一句：「First time?」。

呢個meme大多數用黎諷刺或者自嘲，某個荒謬唔合理嘅現象成為咗常態。呢個meme第一次比人使用嘅內容係：「當你（美國學生）正在躲一個校園槍擊手，而外國交換學生開始哭泣時」。

 

小男孩問大人問題

相信大家一定睇過呢幅萬能key嘅meme，出處卻係鮮為人知。源於2004年上映嘅《小飛俠前傳之魔幻童心》（Finding Neverland），呢套戲cast都勁架有Johnny Depp同Kate Winslet。大家又認唔認到呢個meme嘅男人係Johnny Depp呢？劇中飾演Peter Pan嘅創作者Barrie，經常為咗度橋，每日早出晚歸去公園寫新戲題材，有一次遇到剛剛喪父嘅四個男孩，其中一個男孩Peter因為父親嘅離逝令佢一晚長大，唔再相信童話，滿臉愁容。而呢一幕來自電影尾聲，Peter面對摯親死亡，今次無逃避同憤怒，佢知道這個係人生嘅必經過程。

呢一幕好感人，無諗過後來會被用作meme，呢張meme可以加對白，內容大概係安慰人而達到諷刺嘅效果。

 

美隊電梯

由2019年開始廣泛被運用同加對白，出自Marvel電影《美國隊長2：酷寒戰士》 (2014) 及《復仇者聯盟：終局之戰》 (2019) 橋段，美國隊長分別喺兩套電影中，喺一樣嘅電梯場景中遭遇相同敵人「九頭蛇」成員。《酷寒戰士》中，美國隊長同九頭蛇大打出手；而作為電影時間序較為後嘅《終局之戰》，佢向九頭蛇臥底講出「九頭蛇萬歲（Hail Hydra）」而避免電梯衝突。

呢張meme可以加對白，內容通常係以好多已存在、過時的笑點，營造出講錯野或者唔好笑比人圍毆等等。

 

「這是鴿子嗎？」

呢2年好多人用嘅meme，出自1991年嘅日本機器人動畫《太陽勇者》（太陽の勇者ファイバード）。主角火鳥勇太郎係宇宙警備隊隊長，因為唔熟悉地球環境所以係個生活白痴，劇中嘅佢正在學習緊新事物，所以就指住一隻蝴蝶問：「這是鴿子嗎？」。後來到2018年，Twitter用戶romiosini post咗一張內容為「男人認為沒有口紅的化妝都是素顏」嘅改圖，先真正令呢張meme爆紅。用呢張meme嘅人可以將「鴿子」同蝴蝶改成其他野，冠以主角各種身分然後諷刺某種人對某件事嘅誤解或者無知，或者可以諷刺時弊。

 

Math Lady

另一張唔多出現但都一定會見過嘅meme，有啲人會叫佢做math lady，係來自2004年嘅巴西電視劇《Senhora do Destino》（命運夫人），劇中反派女子Nazaré Tedesco 綁架咗主角兩個月大嘅女、偽造出生證明然後扶養成人，當時呢一幕佢正在獄中用力思考自身處境。

呢張meme係點散播嘅呢？2016年，Math Lady喺Buzzfeed嘅葡萄牙文社群受到矚目，之後9GAG 就po咗有四張截圖拼埋一齊，上面加上十分match嘅數學公式，令成張圖情況睇嚟更複雜難解，就造就咗呢張meme。呢張meme嘅意思比較直接，可以用於講難明複雜嘅數學或者認真思考嘅過程。

 

Pablo Escobar Waiting

出自Netflix熱門影集《毒梟》（Narcos）喺2016年嘅第二季，係改編自哥倫比亞傳奇毒梟Pablo Escobar嘅真實故事，《毒梟》緊張刺激又充滿張力，第二季講到毒品帝國衰敗同Pablo Escobar嘅殞落，飾演Pablo Escobar 嘅 Wagner Moura就將作為毒梟嘅寂寞同落寞詮釋出嚟。

播出之後，好快就有網友將三張Netflix放出嘅劇照合拼為呢張圖，Reddit版上有零星流傳。meme有時被解釋為悲傷或者無聊，意思直接易明。

 

資料來源：

F.E.Ws 少述派勢力

Meme Fandom

NOWnews

鄉民新聞

培養meme