校園Guide

成日上網見到人哋啲寵物貓狗好QQ,係咪都激發起大家想做貓奴／狗主嘅小心思呢。貓奴小編親身認證，屋企有隻小動物真係會大大提高生活幸福指數！但喺養寵物之前，不如考慮下以領養代替購買？其實領養嘅好多小動物都可愛指數爆燈，不過好多人都唔知應該要點樣揀一間可靠嘅領養機構。小編今日就推介5個可靠領養機構，有條件嘅朋友仔不妨快啲帶自己隻小朋友翻屋企啦～

 

1.救狗之家 (HKDR)

Hong Kong Dog Rescue (HKDR) 救狗之家是動物收容中心，主要接收來自漁農處的狗隻。因為如果佢哋喺四日內無人認領，就會遭到安樂死。呢個機構堅持唔會進行人道毀滅，而且會為狗狗嚴格挑選新主人。想成為狗主嘅人都先要填寫問卷，再經過救狗之家嘅徹底審查，先可以正式收養狗狗，令人感覺非常體貼同可靠。

 

2.香港拯救貓狗協會 

HKSCDA為唔同嘅流浪貓狗提供糧食、醫療、絕育及領養等服務。除了主動援救流浪街頭的受傷貓狗外，亦都經常會接收被市民遺棄的小動物。而領養前亦都要求領養者承諾為動物提供一個合適的居所同埋盡其所能給予動物最好嘅照顧。而佢地每年亦都會有唔同嘅領養活動，希望可以喺多方面為動物出力。

 

3.Lifelong Animal Protection（L.A.P）

呢個機構創辦至今已有18年歷史，多年來為數之不盡嘅貓狗尋找牠們嘅新家園。而係領養寵物之前，L.A.P嘅義工團隊會先對你進行訪談同埋家訪，一絲不苟哋確保被領養的動物得到悉心照料先至會將小動物放心交俾你。而佢哋嘅IG上亦都會不定期咁刊登被遺棄動物，有興趣嘅朋友仔可以去睇睇～

 

4.香港動物基金 (Hong Kong Paws Foundation)

呢個動物救援組織同本地嘅各個收容所都有密切合作，可以真正為貓狗提供佢哋所需嘅照顧而唔係同非法繁殖場合作，機構希望確保每隻動物都搵到一個真正充滿愛嘅新家庭。如果你對於領養一隻cuties 有興趣嘅話，可以上佢哋嘅social media睇下先！要同啲真正可靠嘅機構合作先係對寵物最好嘅選擇。

 

 

5.香港愛護動物協會 (SPCA)

香港愛護動物協會係非政府資助的慈善機構，成立接近100年期間救助咗成千上萬隻流浪動物。機構嘅宗旨係提倡愛護和防止虐待動物，並通過教育宣揚尊重生命，創造人類與動物和諧共處的社會。無論係貓狗定係倉鼠都可以收養，不過要花啲時間同動物互動，協會先至會俾動物同新主人返屋企。