校園Guide

仲有唔夠1個月就9月啦！準備又開學啦！係大學讀書係一件好令人嚮往嘅事，好似比起讀中學更加free咁，仲要好多嘢玩添！今日小編就為各位今年入U嘅你介紹下大學必做5件事！！！

 

1.住hall

好多學生都覺得同屋企人一齊住咗咁多年，都好想試下自己搬出去住，可以自由自在，又唔洗比父母管住曬。所以大學申請住宿舍絕對係一個離開父母魔掌嘅機會！不過住hall都有幾件事要注意啊！第一，最好搵一個好roommate。呢樣係好重要，如果你搵到個roommate係做野冇嚟手尾，污糟邋遢，引一大班昆蟲返嚟，你都可以預見到自己嘅宿舍生活係有幾恐怖！第二，如果係你自己嘅物品、食物，最好就用完就擺返去自己房，因為住hall常見嘅問題就係順手牽羊。第三，住hall一定有好多嘢添置，所以入住之前可以寫個checklist，睇下有啲咩係可以係屋企拎，到步後再睇睇有啲咩係需要再買。

2.上莊

「上莊」呢個term大家成日聽，但究竟係咩？上莊即係擔任學生會或者學會內閣的幹事。上莊的而且確係好玩，又可以識到好多人，但係上莊唔係淨係玩㗎！上莊係一個責任，你要為自己支莊付出！上莊係會佔用自己非常多時間和心機，如果學業上都未搞得掂就唔建議啦。

3.讀書

成日聽人講「大學唔洗讀書㗎！」你以為大學真係唔洗讀書？咁你就錯啦！大學學嘅內容比中學更難掌握，而且上堂模式同中學唔同，一個教授對百幾個學生，你想問問題就更難！再加上冇教授會篤住你溫書做功課，全憑自己嘅努力同自律。冇理由咁辛苦升到大學，最後爛住gpa畢業㗎嘛！讀大學當然想玩，但係應該讀書嘅時候就讀書啦！

4.Part Time

大學生活有好多活動，洗費自然大，又開Sem飯，又要同Omate Re-U，樣樣都係錢。但係升到大學，唔想下下都攤大手板問屋企人攞錢，呢個時候就可以去搵下Part time。大學timetable可以自己編，有時可以騰出一至兩日day off比自己返下Part time，搵下額外收入。而且可以儲下工作經驗，隨時對將來就業有幫助。我哋uFinance都有定期係網站update一啲兼職或者實習工作，等大家搵工都易啲！

5.Exchange

好多大學都提供暑期Exchange，比學生去海外其他大學體驗當地嘅文化同大學生活等。英國、澳洲、德國都算係比較熱門嘅地方。遊學真係好正，又可以認識唔同國家嘅朋友仔，可惜依家因為肺炎，呢兩年都冇得去外地，想去Exchange真係好冇咩可能。希望肺炎快啲完結，而嚟緊升讀大學嘅你地可以有機會去Exchange啦！