【升學/Non-jupas】Interview五大貼士-下︱ uFinance 大專學生資訊貸款平台

校園Guide

【升學/Non-jupas】Interview五大貼士-下

Elsie Tang | 18/02/2019

3．睇新聞

老老竇竇，宜加個個prof都話希望學生可以睇吓新聞陪養吓國際視野；但係亦都老老竇竇，宜加先睇新聞都真係太無從入手。作為一個對新聞議題都無乜自信嘅人，我都不幸地多次遇到時事題，真係從林鄭到trump trump，無不曾經被我沈旭暉上身般評論過。面對呢啲情況，只可以講嘅係見招拆招，interview之前睇吓呢幾日發生嘅事，group interview有啲咩事就執人口水尾加兩句懶有見地嘅comment，individual真係措手不及就只好東拉西扯一下。記住呢個時候唔好慌張，面露笑容，祝你好運。

4．圓滑

所謂interview最無新意但又用得最多嘅就係stress test。即使面試官態度有幾惡劣、面有幾西、講嘢有幾寸，你有一字記之-忍！你忍咗今次個世界以後就係你架喇。所有由你成績以至你自身嘅攻擊，例子包括「咦你咩咩科考咁差憑咩入黎啊」「睇一睇，你ielts寫作好唔掂吓喎」，要記住古語有云，沉住氣硬漢子，呢啲都只係對你演技嘅考驗。佢希望嘅係見到你莞爾一笑，然後黎一個順水推舟，將佢嘅注意力引渡返去你想佢注意嘅地方，盡情顯露出你有容乃大嘅超凡氣度。
當然，其實事前你都可以諗一諗你可以被攻擊嘅地方，如果department有prep talk你無去聽過嘅；的確某一個sem你gpa考得未如人意嘅；課外活動無乜嘅，你都可以諗定一個冠冕堂皇嘅答案。係interview，佢無非都係想見識吓你死都拗返生、鬈都拗返直嘅語言偽術。

5．Thank you Letter

當interview去到尾聲，你賣多最後一個笑，微一欠身同面試官道別，你心諗「好嘢！」嘅時候，你以為咁就完喇咩，唔好咁天真啦。如果你真係好想拎到個offer，不妨臨走用心記一記住面試官個名，返屋企打多封thank you email俾佢，為你嘅interview黎一個結尾點精昇華，用你嘅偽真誠打入佢個心。
至於email嘅內容，係google用罐頭信未免太無誠意，不過所謂天下文章一大抄，最好方法就呢度抄一句個度抄一句，加一兩句你對interview嘅感想；對面試官手下留情表示謝意；以及展現你對你未來貢獻于department嘅信心。做齊哂呢啲，你就真係可以心唸一句「好嘢！」等收offer架喇。

去到呢度，你為咗個interview可以做嘅都已經做哂，最後可以同你講嘅就係「加油」。
都係個句，平常心，就可以。