校園Guide

就到就到！日常生活中嘅謊話，唔知大家講過幾多句？今日話比大家知背後嘅真心話。

 

1／告白對象：「你真係好好人。」

翻譯：拒絕（=好人卡）。

 

2／問另一半或者朋友有無嬲，對方沉重或者好冷靜咁講：「我無嬲」

翻譯：真係嬲。

如果真實無嬲，通常聽到你咁問嘅時候，反應會比較慌張咁話：「點解覺得我有嬲」／「我做咗啲咩令你咁覺得」。如果對方反應係不斷重覆：「無啊無啊真係無。」咁就應該係有嬲不過被發現了。

 

3／約咗朋友，佢：「就到」／「5分鐘後到」

翻譯：有機會真係就到；但如果係慣犯，通常會報少幾個站、講少10幾分鐘，係起碼，甚至明明門口都未出。

 

4／另一半：「我瞓啦，早抖。」

翻譯：依家就係我嘅me time，我想煲劇／打機，唔好煩我。

 

5／撞到唔熟嘅朋友，臨走前話：「搵日食飯。」

翻譯：只係一句收尾完場嘅對白，唔洗太認真上心，通常都好少真係約，真心約嘅可能就會喺當下就留時間。

 

6／食店阿姐：「靚仔想食咩？」

翻譯：嗌你靚仔氹你快啲幫襯。

 

7／細個嗰陣，屋企人：「幫你存起啲利是錢。」

翻譯：幫你存起用喺適當嘅地方，九成九大家都唔會拎得返。（或許還是用喺我地身上啦><）

 

8／「清貨大減價 最後一天」

有啲鋪頭「最後一天」咗好幾年，其實只係想吸引消費者。