校園Guide

去旅行無非都係想遠離日常生活嘅煩囂，放低平日嘅重擔同忙碌，放鬆吓自己，充一充電。
依家平平地千零蚊就可以去個台灣旅行，不過黎黎去去都係台北、高雄，有無啲新意啊？台南未嘗唔係一個好選擇。
 

Day 1

台南市人煙稀少，相比起台北，台南街上路人唔多，遊客更加少，完全唔洗同人逼，好舒服，真正「離時代遠遠，沒人間煙火」。喺餐廳、Cafe慢慢坐都唔會比人催，最適合慢活不過。

Day 2

台南文化藝術氣息濃厚，市區以外，有好多老街、文創藝術區、精品店，個人都好似有氣質啲。神農街掛滿燈籠加上古色古香嘅建築，別有一番風味，遺留唔少日治時期嘅建築史跡；安平古堡記載台南嘅歷史，見證府城嘅興衰，唔講唔知原來荷蘭統治過。

Day 3

去旅行無理由淨係留喺市區，離開石屎森林，去到户外欣賞吓風景，又可以打卡影靚相，留低美好回憶。唔少旅遊户外景點，入到去好似去咗第二個世界咁，因為真係好大好寬廣。台江國家公園係IG熱點，有海，有幾棟白色建築，成個畫面好靚。仲有七股鹽山，大約行三、四十級樓梯就上到頂，沿路真係有鹽架，上到去可以睇到園區風景，影相出黎嘅效果都幾似雪山。

Day 4

你以為台南無得shopping?其實同樣有好多百貨公司同手信店。林百貨相信大家都耳熟能詳，共有六層，賣食品、茶飲、工藝品、生活用品等，佢仲係一個古蹟，建築外牆保留咗歷史嘅原貌。台南每一條巷都有好多小店，大部份都又平又好食。夜市方面，出名嘅有武聖夜市同花園夜市。夜市係一個大操場嘅規模，空間唔狹窄，有多種類小食，都不缺攤位遊戲。

Day 5

台南高鐵站附近嘅奇美博物館，佔地寬廣，建築外形宏偉又典雅，富有西方韻味。入面有唔同展覽，例如有樂器、動物、兵器等。不過留意返，館內係不准拍攝架。

總括黎講，台南係一個近近地又慢活寫意嘅好去處，下次出走又多個選擇啦。
 

延伸閱讀:

【大學生荀工】9-12月功課輔導班導師(薪酬：$80-100／小時 )

【Media人請入】香港電台兼職節目助理-時薪$74 (05/08/2019截止)

【PR/Marketing 實習機會】秋季 KPMG 實習 – Market Services (Event Team)