校園Guide

住Hall就係離開自己comfort zone，學習好好同人相處共住一室，脫離屋企人，學習獨立，仲有享受hall各樣嘅文化。然而，事情往往都唔係咁順利，小編比大家一啲提醒，住hall有機會遇到呢啲幾遭遇，相信住緊hall嘅你地都會有共鳴。

 

1／融入唔到Hall文化

住hall最common嘅文化離不開劈酒、落酒吧、MJ、飲早茶、行夜山等等嘅夜生活，hall入面一半以上嘅人都係咁，當你融入唔到，自然就唔會同佢地玩，要再搵其他志同道合。再講，每個Hall嘅文化都唔同，揀Hall之前當然要做足資料搜集，入到去之後一年間會有大大小小活動，如果覺得格格不入無興趣join活動，咁對你住嘅hall都會無乜歸屬感，少咗樣樂趣。

 

2／地方污糟

可能係hall太舊，或者食物擺咗喺房或者common area太耐，會惹勁多蟲同曱甴，真係好嘔心。記住要洗碗，唔好擺野食野飲過夜啊。

 

3／無朋友

同frd或者同學或者莊員未必reg到同一個hall，又無玩hall ocamp就難啲識到朋友。如果同roommate唔夾或者唔係成日見面，又同層友唔熟，咁你住hall嘅生活就會少啲樂趣。

4／Toiletmate衛生情況惡劣

試過Toiletmate搞到廁所地下勁濕、馬桶塞晒、有屎漬、經血等等，真係好得人驚。有時會寫啲忠告貼喺廁所比toiletmate睇，佢地又會貼返張紙回應你。

 

5／同roommate唔夾一：作息時間太唔同

對於夜鬼黎講，凌晨先係每日嘅黃金時間，起碼凌晨1點先開始精神，越夜越有機。如果你係早瞓又有個夜鬼roommate嘅話真係一大悲劇。夜鬼roommate如果識得尊重你，去朋友房大玩特玩，咁都無乜問題，只係有機會返黎嗰陣嘅開門聲嘈醒到你；如果大家都留喺房，夜鬼roommate點都會玩電話或者電腦到最後一刻，開燈通宵做paper，夜媽媽先黎吹頭，甚至會無熄燈就瞓著咗，嚴重影響到睡眠質素。

所以建議大家如果同roommate作息時間太唔同，要講出黎，好好溝通，搵到大家個pace，同埋尊重對方。

 

6／同roommate唔夾二：無偈傾，一句起兩句止

有時聽到人講同roommate傾通宵偈，覺得好羨慕，偏偏自己同roommate就尷尷尬尬咁，一開頭識自介完之後，每日對話只得hi bye。

 

7／同roommate唔夾三：roommate永遠聽唔到鬧鐘響

roommate永遠訓到黃朝八晏，聽唔到鬧鐘響，即使佢地個鬧鐘已經較到有幾大聲得幾大聲，但只會叫得醒淺眠嘅你，個鬧鐘起碼響成十五分鐘先醒，如果佢地係八半堂九半堂就大鑊。

8／同roommate唔夾四：roommate嘈過行雷嘅鼻鼾聲

有好多人就係因為同房嘅鼻鼾聲搞到訓唔著，第二日上堂都無精神，甚至係dayoff都無覺好瞓。可以做嘅事就只有比佢更早瞓，或者買返個耳塞。大鼻鼾聲佢都唔想架，的確好難控制到，住hall就係離開自己comfort zone，體驗一下，過程中學習要嘗試包容對方。

 

9／同roommate唔夾五：同roommate夾錢買野但佢從來都無比過錢

遇到自L私嘅roommate真係喊三聲。例如一齊夾錢買廁紙、杯麵、洗衣粉等等，總係走數，或者講完payme之後又無咗回事，開聲問佢拎返又唔好意思，啲錢就好似潑咗出去嘅水一樣收唔返。

 

10／同roommate唔夾六：無交帶

帶女／男朋友上黎唔出聲，鎖門又入唔到去拎電腦要白白等你地完事，唔鎖門又你眼望我眼尷尬；同frd去房開P又唔講，上到去先知；其實交帶一聲真係咁難咩？