校園Guide

相信因為疫情嘅關係，大家都多左時間留係屋企。有養寵物嘅你，多咗時間照顧主子！無養寵物嘅你，成日碌ig見到啲可愛嘅寵物片，係咪都心郁郁想養寵物呢？今日就等小編同你講下五種另類寵物啦！

 

1/ 龍貓

講起龍貓，大家可能會諗起宮崎駿的經典動畫作品。其實佢嘅真名係毛絲鼠，睇佢圓碌碌、毛茸茸嘅身材，超得意啊！龍貓嘅平均壽命大約十至二十年，適合生存溫度大概係18.3至26.7度。而龍貓其實係好怕水，掂到水好易有皮膚病㗎，所以要養佢就要好小心控制個居住環境。另外，龍貓可以跳自己身高嘅7倍高，簡直就係跳高高手啊！所以奴才們都要特別小心，因為佢咩都咬，破壞力特強！千祈唔好令佢討厭你，因為龍貓攻擊人嘅方式唔係咬人，而係對住你屙尿。有啲網民就覺得龍貓性格有啲似貓貓，係熟悉環境之後會認主人都會痴人！勁QQ！

 

2/ 刺蝟

跟住落嚟要講嘅就係刺蝟，相信大家都唔陌生！而且一諗佢，就可能會諗起佢啲好拮手嘅刺。刺蝟都算係比較難親近啲動物，好驚人，好易起鋼。佢嘅平均壽命大概四至六年。而佢係動物界嘅夜青，最鐘意夜晚熄燈之後跑嚟跑去、走入啲家俬到等等。佢需要嘅居住空間較大，仲成日周圍便便，所以養刺蝟真係少啲耐心都唔得㗎！

 

3/ 守宮

近年愈嚟愈多人養守宮，小小嘅身體帶水汪汪嘅眼睛，有時露岀可愛嘅笑容，睇張相幾咁鬼嘅pose，加上身體特別嘅花紋，好可愛呀！佢嘅平均壽命大概六至十年，守宮有好多品種，例如豹紋守宮、睫角守宮、肥尾守宮等等。守宮比較容易養，算是爬寵界嘅入門級選擇。對爬爬有興趣嘅同學仔可以考慮下養守宮㗎！

4/ 鸚鵡

最後想介紹嘅係鸚鵡，鸚鵡種類真係多到數唔到！而比較多人認識嘅有玄鳳鸚鵡、虎皮鸚鵡、金剛鸚鵡等。最近比較多人養嘅多數係中等體型的鸚鵡，佢地嘅毛髮都生得好靚㗎！唔同種類嘅鸚鵡性格都好唔同。例如玄鳳比較細膽、好呆、好萌！而虎皮鸚鵡就比較惡，你激嬲佢，佢可能會啄你或者咬你㗎！不過鸚鵡吱吱渣渣咁學人講野，真係幾搞笑㗎！

當然，養得寵物就要盡好主人嘅責任！要好好衡量自己嘅能力同時間、耐心等等，諗清諗楚先好養寵物呀！仲有記得支持領養代替購買呀！