校園Guide

相信大家身邊都總會有一兩個，你覺得佢整體實力唔差，但又遲遲都未出到pool既fd，到底係咩原因令佢地憑實力單身呀？睇下你個個fd係咪中左以下既特質！

眼角高

我諗十個有十一個都會同你講，我要求好低嫁咋，唔係太睇樣，正常就得，然後一拎張相出黎發現驚為天人，佢地正常既standard大概係10分為滿分要7分以上先叫合格，都仲未計其他條件，男既要高大靚仔有錢有風度又幽默，女既要gfable有樣有身材有長腿又要唔可以港女，但大佬呀，你揀人時人揀你，試下重新審視下自己個擇偶條件睇下依個人係咪存在先？

比較心作怪

人比人，比死人，相信如果大家唔止拍過一次拖，都會唔小心將新對象同你個ex做比較，佢以前會點點點嫁，新個個好似都唔夠好，其實每個人都有佢值得欣賞既地方，與其咁樣比黎比去，不如學識下欣賞人地獨特個一面？

性格缺陷

有一種人，同fd相處個陣可能係好正常，就係唔識同異性相處，簡稱冇sense，該做既事冇做，不該做既事就做齊，唔出聲都呃到下人，但一傾耐左就真係搞唔掂，嚇走哂d人

不愉快經歷

大家活左咁耐都應該有不少既感情經歷，最基本既就係失戀啦，就算你未拍過拖，都一定有試過暗戀人／食檸檬／不了了之無左下文，因為以前既經歷，就令到自己驚左拍拖，成日對另一半疑神疑鬼，永遠都唔敢跨出個一步，怕失敗，對自己同埋感情無哂信心

唔知自己想點

多數依一種人，都係唔容易投入一段感情，冇個陣又叫哂春話自己無拖拍，到有人approach個陣又係度逃避，唔願意去嘗試，自相矛盾到爆，都唔知自己想要d咩追求緊d咩，多數依個時候d fd都會贈你一句，你都係食自己算啦

雖然上面講既野好似都係負面居多，不過小編覺得拍拖依樣野都係好睇緣份既，如果遇唔到岩既人都唔好為出pool而出pool，寧缺勿濫呀嘛～