【留定走？】5個升學移民地點推介+懶人包︱ uFinance 大專學生資訊貸款平台

校園Guide

【留定走？】5個升學移民地點推介+懶人包

Marcus Lee | 27/07/2020

呢排唔少香港人都諗緊移民，尤其有諗過升學嘅學生，當然想一路讀學位一路坐「移民監」慳返啲時間啦。小編都諗過移民，所以都睇過唔少資料，今日就同大家分享吓升學移民嘅地點同懶人包！

台灣

可以話其中一個香港人最熟悉嘅移民地點，相信好多人都嚮往台灣嘅生活節奏、民風、物價，當然仲有台灣最美嘅風景啦~ 根據中華民國內政部移民署網站，香港人去台灣升學畢業後，需要喺台灣當局許可下連續留台居留滿5年，每年在台灣地區至少居留183日以上，而且最近一年（即最早第五年）於台灣地區平均每月收入超過基本工資（新台幣2萬3,800元，即港幣約6200元）嘅2倍，就可以申請定居。另外，香港人喺台灣畢業後工作，係要經當局嘅「評點配額制」依以下項目評分，累計點數滿70點先可獲發聘僱許可，諗住去台灣升學工作移民嘅同學要留意啦：

資料來源：中華民國內政部移民署、香港澳門居民申請在臺灣地區定居送件須知——居留一定期間、中華民國勞動部、畢業僑外生工作評點配額制須知 – 勞動力發展署
加拿大

近來加拿大政府都幾歡迎升學移民，對留完學嘅畢業生移民要求唔算高。加上加拿大本身都住咗好多香港人，分分鐘去到可以講廣東話多過英文，絕對係一個升學移民嘅大熱點！
申請人喺加拿大升學學業後，可於180日內申請工作許可證（Post-Graduation Work Permit, PGWP），成功後一般嚟講可以喺加拿大工作最多3年（視乎升學課程而定）。申請前過去3年入面擁有最少1年工作經驗（skilled work experience in Canada）後，就可以申請加拿大經驗類移民計劃（Canadian Experience Class）。留意返：全職學生期間嘅工作經驗唔計算在內。
另外，其實喺加拿大讀碩士係相對划算！如果申請人係25-40歲、喺香港已經完成學位，咁可以考慮吓讀2年嘅碩士課程，通常喺加拿大讀碩士一年學費都係大約10-20萬港紙左右。若果係已經結咗婚嘅學生，喺加拿大嘅大學讀緊全日制學習，你嘅伴侶都可以申請工作簽證，喺加拿大居留。適合嘅不妨考慮吓～

資料來源：Work in Canada after you graduate – Government of Canada、Eligibility to apply for the Canadian Experience Class (Express Entry)
澳洲
好多香港人都會去澳洲留學，而且小編唔少朋友都好鍾意澳洲嘅生活環境，想留低工作甚至移民。喺澳洲讀完書畢業後，如果你: 1. 50歲以下; 2.有受認可嘅簽證; 3. 有受認可嘅當地課程證明，就可以申請兩款畢業生暫時性簽證 Temporary Graduate visa（subclass 485）:
a) Graduate Work Stream —— 擁有與工作有關嘅特定技術資格證明的話可以申請居留18個月，而且可以帶埋屋企人過去。
b) Post-study Work Stream —— 擁有當地受認可學位就可以申請居留2-4年（視乎學位），亦都可以帶埋屋企人過去。
成功申請後就可以喺澳洲工作同生活喇，累積足夠分數後就可以申請入籍甚至永久居留。
資料來源：Department of Home Affairs – Australian Government
英國

要移民英國就相對比較難，但既然咁多香港人喺英國讀緊書，都講講英國嘅升學移民啦。根據英國政府嘅網站，拎合資格簽證喺英國讀書係唔足以申請居留嘅，當局要求申請人至少喺英國合法居住10年先可以申請，咁就要搵雇主聘請攞工作簽證喇。

資料來源：GOV.UK
新加坡

最後講講比較少人講嘅新加坡。原來新加坡升學移民反而比較簡單，若你已經係合資格喺新加坡留學嘅學生，而且喺申請嘅時候已經居住滿至少2年，並且完成咗至少一個國家考試（i.e. PSLE or GCE ‘N’/’O’/’A’ levels）或者所謂嘅「直通車課程」（Integrated Programme, IP）咁就已經可以申請永久居留權㗎啦。如果想留返喺亞洲嘅可以諗諗佢！

資料來源：Immigration & Checkpoints Authority、APPLICATION FOR PERMANENT RESIDENCE FOR FOREIGN STUDENTS