校園Guide

感情路上總係頭頭碰著黑，你以為自己係仆街磁石，其實可能你有以下N個戀愛錯誤觀念！

 

1／過於以對方為優先而壓抑自己

例如強逼自己改變行為而感到唔舒服、收埋自己真實嘅諗法去討好對方，單方面委屈求全。呢啲觀念錯嘅係對自己嘅mental唔好，令你心理極度不平衡，甚至抑鬱亦不足為奇。而對二人嘅關係上，以真實嘅自己示人，對方先可以鍾意真實嘅你。如果你後來先展現返最真嗰面，好可能呢段感情未必係你最想要或者最適合你嘅關係。再者，有主見的人先有魅力，鍾意你嘅人會希望見到真實嘅你。

 

2／有公主病王子病自我中心要人氹

自我中心，唔單止喺戀愛上，本身就係一種剋人憎嘅性格。可能呢啲人會搵到個願捱嘅另一半，但長久而言，係無人頂得你順，呢種性格會趕走真心鍾意你嘅另一半。即使你係靚仔靚女，客似雲來，但30歲打後外貌走下坡，有得揀後生嘅，點解要揀你？之後無人再願意咁無條件寵一個嘅自我中心嘅你。遇到嘈交，對方無責任要先道歉，每個人都有自己嘅情感，一味要對方say sorry先都會令感情出現嫌隙。

 

 

3／拍拖到無自己生活

例如將所有時間都比晒另一半，糖癡豆咁。愛係要付出，但要記住對方並非你嘅一切，你仲有屋企人、朋友、事業、人生目標、想做嘅事。一旦分手，整個人會無咗一半，而剩返嘅一半亦唔係自己，充滿空虛。而且有啲人都唔鍾意另一半咁樣，覺得好大壓力，對段關係亦唔健康。愛別人之前，先要懂得愛自己。

 

4／將戀愛當成童話故事

幻想會有個富豪睇上自己，排除萬難追你，帶你離開貧苦，結婚過幸福生活？係咪睇得太多韓劇？停止將啲虛幻情節搬到現實，醒吓啦！現實中每個人受生活條件、家庭背景、社會環境等等所限，你唔係公主，佢更唔係王子，唔好咁多幻想，亦唔好FF太多，錯過真正愛你嘅人。

 

5／愛我就要包容我所有缺點

小編的確認為愛係要互相包容對方嘅優缺點，但唔可以當對方嘅包容係老馮、係必須，因為要對方無條件接受你一切缺點真係唔易做到。如果自己有對方都難以接受嘅缺點，就應該顧及對方感受同界線，嘗試改善或者調整一吓。否則，當作呢種愛係必然，反而忽略咗對方感受，咁就唔好啦。

 

6／對方唔可以有任何異性朋友

唔少人希望另一半同一切異性朋友斷絕來往，del contact、unfriend。但其實係好難做到的，生活圈子裡面唔係男就係女，點樣無得同同事聯絡？如果識咗好幾年嘅中學同學又無得見？每一個人都有自己嘅生活圈子，勉強對方要斷絕一切異性friend，顯得你小氣、唔信任、無自信之後，仲好易有反效果。如果對對方同異性相處上有意見，應該直接地提出，傾個共識出黎，而唔係一味限制同管。

 

7／對方一定要同自己100%夾

唔少人幻想另一半係自己靈魂伴侶，生活習慣、興趣、性格等同自己完全fit，完全唔會嘈交；咁樣係無咩可能的。如果有咗另一半，要明白世上無完全夾嘅人，只有願意互相遷就同願意磨合嘅人。如果未有另一半，要明白所有愛情都係從相處、吵架、磨合中成長，無野係必然架，所以要求唔好太高。

 

8／無激情就要分手

每段感情本來就會喺激情過後趨於平淡，但由於現今社會流行速食愛情，導致許多人認為兩個人無咗激情、無咗熱戀嘅感覺就係唔愛，但其實唔係架！真正嘅愛情會經得起時間考驗，當你睇見對方缺點，表示你地開始進入另一個階段，只要過到，段關係會變得長久而穩定。

 

9／情侶之間唔可以有秘密

事無大小，只要無講，通通都係刻意隱瞞，存心欺騙，覺得雙方絕對唔能夠保有秘密，先算得上係坦誠、誠實。當然講大話、偷食嘅行為唔可以原諒，但現實中，每個人都有自己不為人知嘅私事，係正常不過。反而應該了解點解對方會唔願意向你坦露，理解背後嘅原因，學習了解同體諒。