校園Guide

近年大家對於保育廣東話嘅意識都增加咗，而係坊間都有唔同組織會推廣粵語，今日就同大家介紹四個Facebook Page，等我地都可以對呢門語言認識同了解更多啦。

迴響粵語文學期刊

《迴響》係一本用粵語寫成嘅刊物，一部分內容係粵語小說，而另一部分就係其他類型嘅粵語文章。到現時為止，佢地已經出咗十六期㗎啦。每期都會邀請到唔同人物用廣東話寫文。對於想接觸更多廣東話嘅你，記得留意住佢地啦。

冚唪唥

《冚唪唥》呢個組織係會定期出版粵拼故事書，而且仲有個網頁上載咗四個唔同系列嘅免費教材，包括「睇故事書」、「睇片」、「聽故仔」同埋「上堂喇」，仲有分小朋友同青年/大人程度㗎添。而且佢地仲有推出「跳跳紮拼音轉換器」，當你輸入咗文字之後，就可以揀分詞同設定，再㩒生成就會出粵語拼音同呢個中文字嘅意思㗎啦，想學多啲粵拼嘅你，呢個工具就好適合你啦。

廣東話資料館

廣東話資料館會分享有關粵語同本地文化嘅小知識，例如佢地曾經出過一篇文章「蔗糖、果糖、沙糖、砂糖，冇乜唔同？」平時聽就聽得多啦，但係問到點樣分別，又真係會考起我地㗎喎。加上佢地係用廣東話寫文章，一次過可以學曬兩樣野添。

Cantonese Mommy

Cantonese Mommy係由一個定居喺海外嘅媽媽開㗎，定時就會用講故事形式，錄啲廣東話小故事上去YouTube到。仲會因應唔同節日出翻相應嘅故事，亦都有唔同系列可以選擇㗎。