校園Guide

野餐嘅季節又嚟啦！平時喺條街到見到幾個幾個著得好陽光又一抽二褦嘅後生仔都會估下佢地係咪準備去野餐。今次就等小編推薦4個野餐熱點比大家，全部都喺親自體驗架～

 

1）西九藝術公園及海濱長廊

 

少數比帶寵物嘅野餐地點西九文化區坐擁無敵大海景，平時都好多市民帶埋狗狗嚟一齊玩！唔想坐草地仲可以坐喺石壆，而且附近有coffee shop，播埋音樂成個氣氛都好chill好舒服～最最最特別嘅位喺開放到好夜，又可以睇日落，唔想太熱太多人仲可以夜晚先嚟野餐，欣賞維港夜景。

開放時間：早上6時至晚上11時

 

2） 迪欣湖活動中心

 

而家迪士尼閒日淨喺開一三五，成日full booking逼爆好多人，小編就推薦大家去迪士尼隔離嘅迪欣湖！去迪欣湖真喺好似去左旅行咁！因為唔止撘到去迪士尼站就完事，仲要行多15分鐘先到，如果覺得夏天太熱唔想行，就要睇好喺迪士尼站開嘅R8巴士嘅班次喇！迪欣湖夜晚7點就關閉，想去呢到野餐就要預早少少去啦！

開放時間：早上9時至下午7時

3）佐敦谷公園

 

佐敦谷屬於熱鬧市區中嘅一個寧靜處，位置較近九龍灣，唔想堂食嘅話可以去個快閃野餐！之前小編去仲見過唔少網店model喺呢到影產品相，你地都可以嚟佐敦谷偶遇下攝影嘅幕後過程。不過呢到假期比較多親子去野餐，好多小朋友一齊玩同吹泡泡。如果想避免太多人就可以揀閒日去啦！

開放時間：早上5時至晚上11時

 

4）青衣公園

青衣公園喺近排新晉嘅野餐熱點，話近唔近話遠又唔太遠。以前比較多居民去散步賞花，而家就多咗唔少後生仔去打卡。不過由於比較多植物，大家記得要帶定蚊拍水去喇。 

開放時間：早上5時半至晚上11時半