校園Guide

如果扮文青可以成為一個契機，比大家接觸文哲史，何樂而不為？

第五集香港文青starter pack，同大家介紹林夕嘅歌詞。好多人聽林夕，文青都唔例外，但大師啲詞唔係咁易明，又多隱喻、諷刺、佛學思想。今日就淺談下林夕眾多首詞當中，具有佛學思想嘅4首歌：不來也不去、弱水三千、秋分、金剛圈。

 

1－《不來也不去》－不種就沒有果

相信唔少人都知道呢首歌涉及少少佛學思想，但究竟係咩含意呢？

血液裡才遺傳悲喜／誰亦難避過這一身客塵

第二段正歌開始，主角開始以佛學眼光去睇。苦痛存在喺人自身主觀思想中，冇人能夠輕易避過「客塵」，「客塵」係佛教術語，指外來嘅煩惱。

垂頭前／沒緣份喪氣／

睡到醒／才站立得起／

盲目過／便看到天機／

反覆往來／又再做回自己

成段都係對比以前睇唔到，依家就睇得到。「看不見則無明，無明則妄而苦；看得見則能觀照實相，實相既知則明而滅苦。」，佛教所謂嘅「如實觀嘅哲學」。

如花／超生了沒有果／如果／過路能重踏過

就當最初／是碎步湖上可不可／

不種下甚麼／摘來甚麼／

像我沒來過／沒去過

如果無辦法開花結果，咁我應該點排解呢？其實一切都係因果，唔種下個因，就唔需要摘來苦果。唔單止「你」不來也不去，就連「我」都不來也不去，只要不來也不去，就無之後嘅一切。

 

2－《弱水三千》－以水為象

三千春江水／暫住寂寞天空／

逛夠了世界／撇進了春風／

活著自活著／萬象在逝水中暢泳／

偶爾愛上過／一些倒影／

流年流成河流流過幾道名勝／

浪停下像拿著鏡／難辨舊日風景

非常出名講佛理嘅一首歌。頭四句，寫水嘅循環。「三千」其實指一念三千，人心一念可有三千性相，與歌詞中水嘅幻變吻合。「世界」出自佛教，《楞嚴經》卷四：「何名為眾生世界？世為遷流，界為方位。」所以一整段都係講佛教輪迴觀。

同樣落自春水

水嘅形態變化萬千，傷心時係淚水，洗澡時是係缸水，抬頭時係白雲，但都係水，山水係唔係山水，點樣看待，取決人嘅心態。森羅萬象不過係動情後嘅一廂情願。

 

3－《秋分》－二十四節氣入題／戀愛週期像輪迴

秋分係二十四節氣之一。整首歌以秋天過咗一半就好分手為題，感情有時限做中心思想，勸喻人唔好執著愛情。「秋分」一詞結合兩個意思，已經好厲害。

落葉鳴謝過／每棵樹／

像菩提若熟透很自然飄下來／

未會順變／如何能節哀

第二節歌詞已經提示大家呢首歌蘊含佛理。菩提果自夏季後開始成熟掉落，時候到了，人要學習放下。

一圈圈相戀周期永不偏差／

在對象裡聚散循環也罷／

愛又暖又冷又暖冰封了又化／

下季自有下個代你開花

簡單而言，每一段愛情如同一次生命，開始、結束，分分合合不斷輪替，墮入輪迴。

 

 

 

4－《金剛圈》－悟空後愛與痛不過虛妄非實

首先要理解金剛圈於呢首歌嘅意思。林夕比擬緊西遊記劇情，每當唐僧念動緊箍咒，孫悟空就會即刻頭痛欲裂。歌詞中，感情就係主角自己嘅金剛圈。

你那金剛圈／最好箍得更緊／

來讓我命運／和你箍緊

但係歌詞主角願意讓感情繼續箍緊自己，讓自己沉溺感情。從好多部分中可見，主角係非常執迷，甘願繼續沉浸於痛苦中過活。

悟空那會相信／愛與痛／很相襯

全歌最後一句比較難明，可以理解為當人悟到空性，便會知道愛與痛不過係虛妄非實嘅感覺，皆為虛假，何來相不相襯。以愛情為題，帶出常人會碰到嘅佛理矛盾。