校園Guide

星座影響性格大家就聽得多啦，但原來血型唔同都會影響人嘅潛在性格！而喺日本、韓國，血型更加係識新朋友時候嘅常見討論問題。小編今日就整理咗唔同血型潛藏嘅性格特點，睇完應該會對自己／身邊嘅人更加瞭解！

1.AB型男仔

通常AB型男仔對於事物嘅要求都比較高，因為佢哋做嘢比較經常會以理性出發，好有自己嘅原則同態度。對待感情亦都會好認真同埋慎重，喺好值得信任嘅類型ke～

 

2.AB型女仔

AB型女仔通常性格都會比較強烈同埋自我中心，外表可能未必好睇得出，但其實佢哋嘅心思通常都好細膩，如果想同佢哋建立更加親密嘅關係可能就要比多少少耐性啦～不過佢哋通常好知道自己要啲咩，所以面對離別亦都會比較灑脫。

3.A型男仔

「完美主義」係佢哋嘅特點，A型男仔通常比人嘅外在感覺都係比較冷漠。且心思比較複雜，希望所有嘢都可以制定縝密的計畫後再執行。而戀愛方面，個性活潑而且愛撒嬌嘅人比較符合佢哋嘅理想型，但同時佢哋有時亦都會因為愛面子而口不對心。

 

4.A型女仔

「永遠諗得比人多」係A型女仔嘅特點，做好多嘢之前都會考慮得好仔細長遠。而如果事情發展未如理想嘅話好容易就好似被打沉咗咁。（小編自己就係）通常都會比較慢熱少少，但一旦對住親近嘅人就會好活潑～利申A型女仔非常專一。

5.B型男仔

 愛恨分明+爽朗率直，B型男仔好似天生就無咩選擇困難症咁。佢哋好清楚自己想要嘅係咩嘢，加上單純嘅性格，喺好多女仔心目中嘅「完美情人」，但值得留意嘅係B型男仔討厭被拘束的感覺，太多嘅控制好容易會令佢哋反感(#ﾟДﾟ)。

ps.聽聞多啦a夢都係B型血～

 

6.B型女仔

「原諒我這一生不羈放縱愛自由」就係佢哋嘅性格寫照，佢哋會好享受屬於自己嘅孤獨。而喺做嘢方面，B型女仔工作style通常比較即興，而對於感興趣嘅事物亦都會好執著。愛情方面會比較急迫，所以好有可能會大方表白心跡。

 

7.O型男仔

O型血男仔通常都比較有親和力，有坦率而且顧全大局嘅特徵！所以佢哋嘅人緣都幾好。而戀愛中嘅佢哋屬於積極表達愛意嗰類，好熱情～但唔好隨便否定佢哋，自尊心強勁嘅佢哋好容易會受傷。

 

8.O型女仔

性格活潑，坦率呢啲特點喺O型血女仔身上可以話表現得淋漓盡致。而隨之而來的係佢哋通常會有較高嘅自尊心，遇到傷心嘅事亦都比較容易暴躁、發嬲。但瞭解佢多啲，你先會發現佢哋潛藏嘅溫柔同脆弱。