校園Guide

UST可以話係相當偏僻、與世隔絕，附近無好西之餘仲要靠轉車先可以出翻市區，唔通真係要被困於荒蕪之處無啖好食？今次uFinance 為大家介紹3間餐廳，都係UST人翻放學必經嘅轉車站點（彩虹、將軍澳、鑽石山）容易搵到嘅隱世美食，希望大家就算去到老遠返學都可以順路填飽肚仔繼續努力讀書啦！

（1）丁爸食府

           

丁爸食府位於彩虹站近牛池灣嘅小巷中，平日都係街坊客人為主，但一到weekend就有好多居港嘅台灣人黎回憶家鄉味道。店主丁爸係正宗台灣人，佢炮製嘅台式小食非常地道，價錢亦都平易近人，全店最貴嘅臭豆腐都只是$45。蛋餅餅底質地結實，帶濃濃蔥香及蛋香，油條乾脆不會腍身，好好食！

按這裡了解更多 （圖：網絡）

（2）Hygge

           

Hygge位置相當隱蔽，埋藏於將軍澳豪宅區內，想去嘅朋友仔要注意入口位置，唔好錯過啊！呢間餐廳好驚喜好有水準，價錢中等價位，中午時段去食嘅話會相對較平。呢度最出名嘅就是食手工pizza，皮薄之餘又有咬口，煙煙韌韌超級好食。另外要介紹嘅就係佢地嘅crepe，聽聞係食過嘅人一定會encore嘅甜品！焦糖海鹽可麗餅上台熱辣辣，焦糖同海鹽嘅比例好適合，咬落去嘅牛油香味撲鼻，試過翻尋味啊！

按這裡了解更多 （圖：網絡）

（3）Until Coffee

       

Until Coffee位於新蒲崗工業區，喺鑽石山站行約7分鐘就可以到達，如果大家落左堂想食件cake飲杯啡不妨黎呢度試試，全白店鋪打卡一流！呢度最受歡迎就係抹茶鮮奶Matchaccino，採用黎自日本山政小山園嘅抹茶粉調泡，濃度都有三款比唔同喜好嘅客人選擇，店員會先了解顧客喜好再推薦合適嘅口味，超級細心。

按這裡了解更多 （圖：網絡）

 

係咪唔講都唔知彩虹、將軍澳、鑽石山呢啲轉車點都有咁多好野食呢？其實只要有顆愛覓食嘅心，大把隱世美食等緊你啊！