校園Guide

教大校址比較偏僻，要返學一係就係大學站坐校巴，一係就係大埔墟站坐巴士，真係相當隔涉。莫講係搵好西，搵間正常小小canteen都好難，所以唔少同學仔有天地堂嘅話，都寧願坐車出去大埔、沙田呢啲地方覓食。今次同大家介紹下4間大埔推推嘅餐廳、小食，順路經過嘅不妨都試試啦！

（1）泰太廚房

泰太廚房聽講係大埔最好食嘅泰國菜，個個都食過翻尋味，信不信由你啦～ 不過價錢黎講都有啲小貴，如果想試最好就call賣一班fd一齊食啦，可以叫多啲嘢之餘除番每個人又唔貴。推推泰式小食拼盆，每樣小食都好食，炸物炸得好鬆脆，全部都勁熱辣辣，脆卜卜。

       

按這裡了解更多 （圖：網絡）

（2）和拉麵

位於大埔舊墟有一間隱世拉麵店 – 和拉麵，佢地嘅拉麵有三種湯底可供選擇，包括：原味、辛辣和味噌，湯底濃而不膩，蔥、蒜嘅份量同埋拉麵嘅軟硬度都可以自行調配。午時時段有拉麵+小食+飲品套餐優惠，相當抵食！不過呢間拉麵店都幾出名，店舖唔算大，中午食就要預左等位啦！

       

按這裡了解更多 （圖：網絡）

（3）泰國佬海南雞飯專門店

呢間海南雞飯外賣店簡直係窮人恩物，學生只要出示學生証就可以用$30買到一盒無骨海南雞飯+紙包飲品，簡直係史上最抵啦！呢度人流一直冇停過，但佢地出餐速度快手，雞肉真係又滑，雞皮又爽，啖啖肉好正，而且油飯好香搭配酸辣醬汁超級開胃，真係好抵又好味！

按這裡了解更多 （圖：網絡）

（4）梁九記海產凍肉公司（芝士蛋糕）

位於大埔墟街市嘅梁九記海產凍肉公司非常出名，尤其係佢地名物—芝士蛋糕！聽講佢地嘅芝士蛋糕非常香滑，芝士味恰到好處，口感又好，一定要買黎試下！

按這裡了解更多 （圖：網絡）

 

覓食其實唔難，只係睇下你嘅覓食心有幾強。各位教大同學仔唔好灰心，跟住我地一齊搵好西啦！