校園Guide

唔少同學仔去到Year 3嘅時候都會開始苦惱：究竟繼續讀Master好？定係出嚟做嘢好？如果你仍然覺得心大心細，以下呢幾點考慮因素相信可以俾到少少思考方向你，令你重新思考你嘅人生計劃。

---

 1.個人興趣

升到上大學就知道，如果major唔係你有興趣嘅科目，真係會讀到生不如死，而讀master嘅痛苦只會倍增。如果你只係想洗底，對自己嗰科唔係真係咁有熱誠，就真係要三思而後行，以免俾咗學費又得著不大。

另外，masters通常分為兩大類，一種係研究為主，另一種就係上堂聽書嘅taught degree。有部份學科重視reaserch master多過taught master，所以亦會有好多人揀讀research master。如果你打算升讀嘅科目係以研究為主，咁就要問問自己係咪真係有興趣同埋毅力花幾年時間做研究，或者係咪想喺學術方面發展。做research除咗要自己構思研究方向，仲要寫論文同參加研討會報告成果，真係少啲啲興趣都做唔嚟。

2.工作前景

你嘅職涯規劃究竟係點？如果你想喺讀完Bachelor之後喺同一個範疇鑽研，等自己未來嘅工作前景好啲，呢個諗法非常不錯。不過，你都可以進一步思考吓有冇需要畢業之後即刻升讀。畢竟有好多Grad job嘅入場券都只需要本科畢業，碩士學位只係未來升職嘅條件之一，累積吓工作經驗同人脈會唔會更有利你喺行內發展？

如果你打算喺同你major唔同嘅行業發展，讀個相關嘅學位的確好有幫助。不過報名嘅時候最好有相關工作經驗或者理由可以說服校方錄取你，否則你有可能要喺職場打滾幾年先考慮報讀喇。

 

3.年紀大，機器壞？

書其實最好趁嫩讀！諗翻自己考DSE嘅時候，腦容量大到可以成本書背翻出嚟，而家真係唔認老都唔得。無可否認，踏入職場之後，要同時兼顧工作同學業係好大嘅挑戰；而且做得嘢耐，可能會搵唔翻讀書嘅衝勁同感覺。如果你有信心可以克服呢啲困難，讀master就未必係你最急切嘅考慮喇。