校園Guide

唔少人有個揸車夢，所以一到18歲就開始plan考車。今次uFinance決定介紹一下學車考車嘅注意事項，等大家可以plan好啲之餘，又可以洗少啲冤枉錢啦。報名考車前有幾個問題大家需要諗清楚先，因為關乎大家嘅「終身幸福」著想。今次我哋就會同大家分析一下「學車師傅 VS 駕駛學院」的優缺點，等大家可以了解更多啦～

 

學車師傅 VS 駕駛學院

決定跟邊個學，其實好影響你將會花嘅錢，同埋你考車嘅路線，以下我哋會好公正咁分析2個選擇嘅優缺。

學車師傅

優點：

（1）上堂時間比較彈性。簡單啲黎講只要你夾到師傅就ok，就算臨時有嘢做都可以deal到。

（2）價錢比較平。因為跟師傅學唔需要一個package買，如果你天賦異稟，又1take pass，應該會慳返唔少錢。

（3）跟足一個師傅。由於你全程只係跟住同一師傅上堂，所以佢會更了解你的學習進度，而作出合適嘅安排。

缺點：

（1）要自行排期考試：因為師傅只係負責教，所以其他交文件或排期之類嘅嘢都要自己做返，有啲哂時間。

（2）學車師傅質素難以保證：大部分情況下，大家都係單獨聯絡師傅而唔係through第三方平台，係欠缺監管嘅情況下，會有風險遇上質素較差嘅師傅（地獄教車師傅有無聽過？）。

（3）唔可以申請持續進修基金：因為只有特定嘅駕駛學院課程可以申請持續進修基金，所以跟師傅的話就要自費成筆學費。

 

駕駛學院

優點：

（1）特定考車路線：駕駛學院學生會有專屬試場和路線，而且都會較少外來車輛，所以學車練車都比較容易，合格機會大大提高。

（2）可以申請持續進修基金：特定嘅駕駛學院課程可以申請持續進修基金，所以就唔會有好大嘅經濟負擔。

（3）一條龍代辦服務：大部分駕駛學院都會為學生代辦筆試、學牌等手續，咁就方便同慳返好多排隊時間啦。

缺點：

（1）Package價錢比較貴：駕駛學院會包括理論課程同埋指定堂數嘅課程，所以相對上價錢會比較貴，而且無得選擇唔要某啲堂。

（2）考試排期比較耐：因為駕駛學院嘅學生都係會係指定路線考，變相係一大班人爭一個期，所以比出面學會排耐少少

（3）有機會轉師傅：如果選擇一啲價錢實惠啲嘅課程，有機會每堂都轉師傅，變相好似每堂都要重新適應磨合。