校園Guide

上集同大家分析過「學車師傅」 同 「駕駛學院」之間嘅分別，唔知大家有無對學車一事了解多左呢？除左諗清楚想去邊度學之餘，都要考慮清楚究竟學「自動波」定「棍波」、「私家車」定「輕型貨車」好，今次就會同大家一齊探討下兩者嘅分別。

首先，「自動波」同「棍波」係指需唔需要操控波箱。選擇考自動波牌既人，操作架車會比較易，所以好多人想「一take pass」就會選擇考自動波。不過考完自動波牌嘅人只可以揸自動波車，如果第時想出國自駕遊嘅同學要特別留意啦。至於揸棍波車嘅人，兼顧嘅嘢會比較多，而且強調手腳嘅靈活配合，所以難度比較高，但考完之後可以揸棍波同自動波車，都會比較划算啲。

 

然後，「私家車」同「輕型貨車」都係一個好需要考慮嘅問題，雖然考私家車牌會比較容易，架車細細架係考泊位時有優勢，但考輕型貨車牌可以同時揸埋私家車，但得私家車牌嘅話就唔可以駕駛輕型貨車。如果你係想考牌搵食或想係第時買Dream Car有多啲選擇嘅話，考「輕型貨車」就會比較著數。

 

以下就幫大家分析左自動波VS棍波、私家車VS輕型貨車之間嘅難度同個人需求兩方面。

 

難度：

（1）自動波相對棍波簡單，容易上手。棍波難度較高，強調手腳協調，容易死火令考試難度大增。

（2）「私家車自動波」比較容易，1 take pass既合格率都高於van。「van棍波」難度較高，不過一次考試可以揸到4種車相對抵啲。

（3）而「van自動波」比「van棍波」易但又比「私家車自動波」難少少，不過合格可以持有（1A、2A）車牌。

（4）「私家車棍波」難度大，好少學生學，導致極少師傅可以揀，學費都自然提高左。

難度： 私家車棍波>van棍波>van自動波>私家車自動波

 

個人需求：

（1）有齊1、2號車牌對於工作黎講會係一大優勢，van棍波合格可加簽私家車，所以輕型貨車同私家車都可以揸「棍波及自動波」即4種車都可以駕駛。

（2）1號私家車牌自動波雖然只可以揸一種車，不過有大量師傅可選擇。而且香港普遍用私家車，平時日常需要足以應付。

*1號牌：私家車，2號牌：輕型貨車

 

大家學車前必先要慎重考慮以上問題，因為諗得唔周詳除咗有機會洗多咗冤枉錢之餘，仲有機會影響你將來揸咩車架！