校園Guide

點解一打風落雨我就唔舒服，唔通連個天都唔鐘意我？其實近排天氣反覆無常，今朝出完太陽之後可以晏晝落雨，嚟緊又就嚟係颱風季，當天氣產生變化嘅時候，你會唔會覺得頭暈頭痛唔舒服呢？其實呢種係一種自律神經失調嘅症狀，又稱為「天氣痛」。想知自己有冇「天氣痛」？繼續睇埋篇文了解更多啦！

 

引發「天氣痛」嘅原因通常都同氣壓或氣溫劇烈變化有關，「天氣痛」會伴隨出現頭痛、耳鳴、頭暈、倦怠等症狀，所謂嘅「天氣痛」其實係自律神經失調嘅一種，因為「內耳」並不適應天氣溫度、濕度、氣壓之間嘅劇烈變化。

另外，不穩定作息亦容易導致自律神經失調，由前年起大家為了防疫都屈喺屋企，成日會引致唔規律嘅睡眠或睡眠不足，加上唔係點郁，少運動亦會令免疫力下降，今年溫差又比以往大，「天氣痛」患者就隨之暴增！

 

點樣舒緩天氣痛？

若然唔舒服嘅原因係「內耳」唔適應天氣嘅變化，專家就建議可以藉由按摩耳朵去緩解天氣痛症狀……

按摩法①：抓住雙耳，將耳朵朝上、下、外側各拉５秒鐘。

按摩法②：將耳朵稍微往外拉，再往後慢慢旋轉５次。

按摩法③：用手指包住耳朵，捏緊５秒鐘。

按摩法④：以手掌包覆耳朵，往後慢慢畫圓５次。

如果最近無啦啦會頭痛，都可以試吓㗎！