校園Guide

拍拖真係好難！搵到個啱又可能天各一方，你住天水圍我住將軍澳，係咪就代表我哋永遠都唔可以一齊 🙁 拍拖唔使日日見嘅～有啲方法即使唔見面都可以令兩個人沉醉喺浪漫環境之中！一齊睇吓有咩3個沉浸式戀愛方法，令你段關係打破地域界限！

 

咩係沈浸式戀愛？

疫情之後我哋人與人之間嘅關係會變得比較疏離，可能會習慣少啲近距搵離嘅接觸，而沉浸式戀愛就係利用科技，透過聲音畫面等感官營造出浪漫嘅氛圍，秘訣唔係在於用咩設備，而係點樣用！其實一啲好簡單嘅方法，即使分隔兩地都依然有被愛嘅感覺！

1. 請對方幫自己二選一

唔知大家有冇玩過戀愛育成遊戲？喺遊戲入面要經常為主角做決定同互動，去推動故事進展。我哋可以拎一啲無關重要嘅選擇，記住係要”無關重要”！例如要去見工，你有一件圓領/V領嘅白襯衫，你問對方到底著邊件好。一定要兩個都係你鐘意嘅嘢，其實揀邊個你都可以接受嘅時候，就俾對方幫你做選擇。

重點係你對呢件事其實已經有意見，你只係問對方意見，令對方喺個過程入面都有參與感，千祈唔好搵一啲人生大事去問對方做決定。呢個遊戲好玩嘅地方係，當你哋揀嘅嘢都一樣嘅時候，果種同步感係會提升大家默契嘅方法～

記住呢個游戲嘅關鍵字，係「互動」！係一來一往嘅過程入面，係亦都會令對方更了解你多啲！

 

2. 分享自己身處嘅環境聲

喺呢個過程入面你唔使錄自己把聲入去，只係環境聲，而呢個環境聲要係一個可以開啟話題嘅聲音，咩意思？例如你搭的士嘅時候聽到佢播一首你中學成日會聽嘅TeenPop，你就可以立即錄低send 比對方，然後分享一吓你細過聽呢首歌嘅時侯係點，或者你果時係個點嘅人～

聲音係一個好容易被忽略，但同時亦需要好留心去聆聽嘅一種感官，當對方認真聽完之後，可能先會發現原來你係同佢調情，亦會令佢感覺彼此好似身處同一個空間咁～大家不妨試吓啦！

 

3. 旅行裝香水係用嚟拍拖用㗎！

通常我哋都以為旅行裝香水係出門嘅時候用嘅～但你又幾可出門時會記得呢啲旅行香水丫！！所以如果我哋儲起呢啲旅行香水用嚟沈浸式戀愛，效果會非常之好，咁個操作方法係點？

我哋可以準備幾支旅行裝香水，1.入面要有一支你鐘意嘅香水，2.你鐘意另一半有呢隻味嘅香水，3.同一支你唔鐘意嘅香水，然後放入一個小信封，要對方估吓邊支打邊支。

你唔使怕對方對香水熟唔熟悉，重點係點樣喺嗅覺上面去刺激佢嘅感官，用沉浸式體驗嘅方式令呢段關係更加鮮明立體！

即使佢估唔中，佢都曾經有透過香氣去幻想出你嘅形象，將你同香氣連結起來。下次要揀禮物嘅時候佢都識點做呢～