校園Guide

Reg Day即係Registration Day，簡單嚟講就係新生嘅註冊日，可以話係作為大專生第一個重要嘅日子。唔好以為Reg Day只係單純地報到，攞完張學生證就走得，其實呢一日可以有有好多嘢做，唔想錯過咁重要嘅一日就要好好準備！今日就同大家分享去Reg day前有咩要準備啦！

---

1.帶足夠嘅現金

Reg Day除咗報到同攞學生證之外，你都會經過一啲學生會或者唔同學會嘅Booth，佢地會不斷向你宣傳，然後叫你入會或者係參加佢哋嘅Ocamp，如果一早預做會玩一個以上嘅Ocamp，想識多啲人，就建議帶定多啲現金去報名啦。不過無帶嘅話，依家都可以用FPS/Payme，但係記得考慮清楚先俾錢啦！

 

2.悉心打扮

有部分大嘅學會會安排新生喺Reg Day影下相，所以悉心打扮都係需要嘅！尤其女仔化妝就唔好太重手啦！

 

3.Keep有用嘅leaflet

Reg Day隔日會有唔同嘅Soc或者hall會派好多宣傳單張俾你睇，可能你會覺得好麻煩太多，會將啲Leaflet就咁就掉咗佢。但係整Leaflet都用咗好多心血，而且當中有啲資料其實都好有用，例如會介紹有關宿舍， 上莊，soc活動等等，慢慢睇完filter下，有用嘅就Keep，真係冇用先掉啦！

4.揀Ocamp

Ocamp可以話係入大學其中一個重要嘅活動，而通常報Ocamp都會係Reg Day嗰日報，所以去Reg Day前可以諗下自己會想去咩Ocamp！小編認為自己faculty嘅Ocamp一定要去，因為可以識到之後上堂經常會見到嘅同學，咁就唔洗驚之後識唔到人一齊做Group Project！

 

5.Join學會要諗清楚

Reg Day除咗係新生嘅大日子外，其實都係學會嘅大日子。佢地會係Reg day當日吸納多啲新會員，為學會賺取營運資金，所以當日你會面臨各Soc非常嘅熱情招攬。但係揀學會嘅時候就要注意自己係咪真係會有咁多時間玩活動，同係咪真係有興趣，又或者soc嘅風氣係點等等。