校園Guide

唔驚唔覺Freshmen BB已經入咗U一個月啦！每年到10月都有好多Soc開始招莊搵新一屆嘅Commitee。雖然人人都話「上莊」係大學五件事之一，但究竟係唔係一定要做嘅事呢？不如等小編以過來人身份分享上莊嘅經驗啦。

（1）上莊係第時返工嘅縮影

由幾時搞活動到活動proposal細節，好多決定都有上莊同Councillors嘅監察同審核，就似你返工老細，好嘅會友善比意見你，west嘅會con你。啲活動proposal前後執幾次先通過到個活動。到活動當日，好多野都係靠成枝莊一手一腳整同準備，其實就係Event 策劃統籌。

（2）Multi-tasking

假設你要返part-time（其實都無得唔返，下面再講），仲要分配時間應付assignment、test、exam，其實得返唔多時間可以搞上莊事務、開會，往往都要犧牲睡眠。再假設你拍拖，除非你另一半都係莊員啦，都好少時間可以情侶二人世界。如果你係U team，比賽仲可能會撞開會、活動時間。所以上莊係一門好高嘅學問，絕對考到你multi-tasking嘅能力，點先可以平衡各方面嘅時間。

（3）Budget planning

話上莊唔洗錢就係呃人嘅，除非你係有錢人，如果唔係，上莊都要一直keep住返工。出咗嘅錢可以claim返，洗幾多錢視乎活動規模，有啲U可以向學校申請資助。其中洗得最多嘅活動應該係Ocamp。好多活動都慳得就慳，物資有得自己喺屋企拎嘅都唔會買。小編都計唔返上莊洗咗幾多哈哈。

（4）大局為重

小編上莊學到以大局為重。上得莊，你好多行為都孭起成支莊，Department，或者Soc，或者成間U，你嘅一言一行都好多人望住，謹慎行事。做事亦要有責任感，唔少人會半途而廢，所以上莊前要諗清楚。

（6）識人好過識字

同人打好關係就做咩都順利得多，例如有時搞活動要人幫手做helper、識邊間鋪頭可以比sponsor或者discount。唔係要你阿諛奉承，只不過友善對人、做好公共關係真係好緊要。

（7）莊期一年，要負嘅責任係超過一年

正式上莊前仲要經過組莊期，為期大概三個月時間「曬莊」、Promotion period、Polling，之後一年先開始莊期，Ocamp之後仲要一路搞活動一路招莊、教莊，到有下莊之後仲要睇下莊活動proposal，再可能喺下莊Ocamp到客串（幫手）。咁樣都兩年啦。
老實講，上莊的確付出好多時間、精神、金錢，但你問我有無得著，亦都唔少。同一班莊友經歷咗好多野，創造咗好多深刻又獨一無二嘅回憶，有汗水、淚水、笑聲，始終無悔上莊。