校園Guide

唔知大家有無同小編一樣都唔知去邊溫書好？想搵個集中到精神嘅地方做下paper，但又唔想下下返到學校咁遠。究竟邊到溫書做Paper先會效率最高？等我哋同你分析一下以下3個最多人揀嘅「溫書勝地」啦！

1. Libra拉把

喺學校摺拉溫書就好多人都會，但究竟夠唔夠效率呢？

拉把夠靜，氣氛凝重認真，如果其他人都好認真咁做paper同溫書，高機率感染到你都認真埋一份，加上有其他同學望到自己做緊乜，理論上會無咁好意思狂玩電話，容易令人專心埋一份，快啲進入狀態。而且，學校拉把有wi-fi、電腦、printer、大量書籍用，設施齊全，方便print notes、交功課、搵resources。

不過都有人覺得拉把好好瞓，好催眠，同埋無得一邊食野一邊做野。

適合：

1／想認真專注但欠自律人士

2／容易被人影響之人士

3／欠缺安靜空間人士

4／屋企距離學校半小時或以下交通時間

5／宿生

不適合：

1／口痕人士

2／交通需時之人士

3／鍾意好動、大聲溫書人士

 

2. Hall

喺hall溫書同屋企溫書看似無乜分別，但實際上可以好唔同。

Hall溫書當然係宿生嘅其中一個選擇啦，首先慳咗交通時間。做野時，用枱又得，瞓床又得，大大聲播音樂又得，有啲人鍾意一班人一齊溫書開心啲有活力啲；如果roommate唔喺到，自己一個溫書做paper就free d，但有機會比hallmate撩你去食宵打牌或者飲酒，外在誘惑大。

適合：

1／宿生

2／自律人士

3／鍾意好動、大聲溫書人士

4／口痕人士

5／鍾意多人溫書人士

不適合：

1／容易被人影響之人士

2／難專注人士

 

3. 屋企

屋企溫書同hall一樣，伙食方面無問題，唔洗交通；用枱又得，瞓床又得，大大聲播音樂又得。

不過前提係你有間房做野，有個私人空間，如果溫書果陣，見到屋企人行黎行去、開個電視睇下、得閒又撩你講野，好難進入到溫書嘅狀態。另外，留喺屋企易有惰性，又有張床嘅誘惑，無人mon住自己，容易放「pair」。如果屋企無printer，除咗一早喺學校print定之外，如果溫溫下書搵到past paper或者exercise就無得用hard copy。

適合：

1／自律人士

2／屋企有安靜空間人士

3／口痕人士

不適合：

1／屋企無安靜空間人士

2／欠自律人士

3／屋企無printer設備人士

 

不過最重要都係了解自己嘅習性，留意自己幾時最有效率，每個人都唔同，並無一個絕對好嘅方法，所以唔洗跟人，自己搵一個適合自己認真專注嘅環境。