校園Guide

就嚟到完sem嘅季節啦！小編都見到有唔少同學仔嘅ig story都變曬放負post，相信大家都好大壓力！不過只要搵到適當嘅減壓方法，今個sem一定可以平安渡過。小編推介以下幾個減壓良方，希望大家可以努力撐住！

 

1. 早晚冥想

就算你冇做開瑜珈，冥想都可以成為你生活中的一個小習慣。冥想可以調整我哋嘅呼吸節奏，個人都冇咁緊繃，好適合睡前放鬆，幫助入睡，或者喺朝早配合伸展運動叫醒自己，打開新嘅一日。小編推薦以下呢個app，唔單止有audio引導你進入冥想狀態，仲提供「急救式」冥想，等你覺得特別焦慮嘅時候可以冷靜下來：

 

^ Headspace嘅app介面好可愛，而且可以選擇男聲或者女聲導航。

2. 進食comfort food

有壓力嘅時候想食嘢係人之常情，如果可以食啲令自己開心啲嘅嘢，做嘢都做得快手啲。Comfort food係指可以治癒心靈嘅食物，唔一定需要經科學證明，只要同某啲快樂記憶有關，都可以視為comfort food，例如係薯片、芝士蛋糕等等。雖然comfort food多數都好邪惡，不過啲卡路里相信會喺我哋造紙嘅時候消耗曬……唔知屬於你嘅comfort food又係咩呢？

 

3. 稍微改變工作模式

你坐喺電腦面前好多個鐘都打唔出字，時間越來越少，但係大腦好似塞住咗，焦躁嘅感覺就會越來越強。你可以試吓站立工作，或者一邊行路一邊brainstorm，呢啲行為可以抵銷長期坐啲工作而建立嘅鈍感，可能會令你冇咁焦躁。

希望大家sem尾努力chur之餘，都要健健康康咁完sem!