校園Guide

新年新開始！無論2023年有幾差，都係時候放眼未來，為2024年嘅自己規劃更加好嘅生活。如果你仲未諗好新一年有咩目標，可以參考吓小編列出嘅4個目標，大家一齊努力！

 

1. 支持減廢生活

「走飲筒」措施可以話係減塑教育嘅里程碑。小編身邊好多朋友開始習慣自備飲管，甚至開始選用可重用嘅生活用品。雖然購買環保產品嘅成本會高好多，但係長遠嚟講需要付出嘅環境成本就低好多！

要實踐環保生活，大家可以由消費模式著手。你可以去幫襯唔同環保概念店，了解吓綠色工業嘅發展現況。

南豐紗廠 – Pimary

Pimary售賣各種推廣永續生活嘅美容產品同生活用品，由可清洗重用卸妝棉到家居裝飾都買得到，店員仲會為你介紹唔同產品嘅特色。如果你係環保新手的話，不妨去嗰度兜個圈呀。

Pimary
地址：南豐紗廠105號舖
營業時間：一至日 12:00 – 19:00

Slowood

Slowood係位於港九新界嘅裸買概念店。大家可以攞屋企嘅容器去買生活用品，例如洗頭水、麥片同果仁等等。價錢係根據重量計算，用幾多就買幾多，唔會擺到過期，浪費資源。

Slowood
地址：堅尼地城爹核士街11號浚峰地下1-3號舖／沙田新城市廣場一期247號舖／中環德輔道中80號中環街市2樓231-233店／

2.養成閱讀習慣

想新一年可以有個新開始，不如試下返璞歸真睇下唔同嘅書，吸收下唔同嘅知識啦！養成閱讀習慣首先可以寫低自己嘅Reading List，記低自己想睇嘅書同埋讀後感，相信一年之後，你會成為更deep更champ嘅人。

3. 積極參與社交活動

拿！叫你參與社交活動唔係指玩交友app，係試下重新參加唔同networking活動識下人。除咗係學校參與唔同soc搞嘅活動外，其實網上都有好多唔同平台提供線下活動資訊比你去報名，例如Eventbrite －一個知名嘅活動推廣平台。你可以係上面search到係你住嘅區域附近將會搞嘅活動，小至瑜伽班，大至演唱會，都可以搵到架！

4. 嘗試儲多啲錢

後生仔當然會想多啲同朋友出去玩，不過玩得多又好容易會做月光族，今年你又儲到幾多錢？如果今年仲係入不敷支，係時候要儲多啲錢，為未來積穀防饑喇。
你可以download啲有趣嘅理財app，掌握自己嘅消費習慣，再檢討吓邊方面可以慳錢：

Fortune City將建設城市同記帳合二為一，理財都可以變得冇咁悶啦！(Android下載/ iOS下載)