校園Guide

我哋次次都係考前幾日博命到廢寢忘餐，企圖力挽狂瀾。作為一個講求效率（懶）嘅人，我最關注嘅問題有：淨番幾日，點先可以爭取時間以最短時間記住最多資料？皇天不負有心人，經過層層篩選後，我發現以下幾個方法科學又易做，無藉口話攰話盛，攞A升grade無難度。

一﹑理想溫習時段

瞓覺前

呢個時段要額外拎出嚟講，因為佢係最黃金嘅記憶時段。瞓前90分鐘最好拎嚟記重點中嘅重點。入睡後大腦會整理日頭溫過嘅資料，你臨瞓前背嘅內容，會係呢種潛意識毫無防備嘅狀態下，係大腦來回縈繞。

99黃金記憶時段

黃金記憶時段嘅說法眾說紛紜，有人話朝早6-7點已經係。咁擺明玩嘢啫，要人6點起身。而如果突然改變作息，係嗰幾日先改起身同瞓覺時間，身體難以適應，溫習成效會好差。好彩仲有其他時段，8-10點﹑18-20點﹑21點至瞓前。

有專家參考艾賓浩斯嘅遺忘曲線，衍生出99黃金記憶時段。第一個9係指9點到臨瞓嗰段黃金記憶時段，第二個9指間隔9個小時內，至少再溫習背誦一次。例如你12點溫完去瞓，咁你瞓7-8個鐘到，起身食完少少嘢就好開始溫番啦。原理係背完書嘅8.8小時後，大部分人只記得36%嘅內容，咁我哋就要係大量遺忘前至少再溫習多次去鞏固記憶。

 

二﹑溫習方法

善用色彩﹑圖案﹑聲音

用唔同顏色嘅螢光筆間底唔同類別嘅重點，例如headings用綠色﹑details用黃色，刺激眼球加深印象。將溫習內容圖像化亦好有用，根據內容畫少少簡單又低能嘅公仔，容易勾起你記憶。另外，有部分人對聲音比較敏感，比起齋睇，讀埋出聲會易記好多，咁你就要試下唔同方法，睇下邊個啱自己。

自問自答

唔好話呢個方法煩同嘥時間，你以為自己IQ150，昅幾眼就記得晒？對住啲notes讀嗰陣，我哋成日以為自己已經掌握晒。對自己誠實啲，唔好再咁多幻想，老老實實遮住佢，背番啲嘢出嚟，捉下邊啲位錯咗，咁先知原來自己乜都唔記得嘛。

向別人講解/互相提問

原理同「自問自答」差唔多，旨在互相提問嚟增強記憶。但呢個方法嘅另一個好處在於發掘到自己忽略嘅point，因為大家理解資料嘅着眼點唔同，好可能問到對方無為意但其實重要嘅問題。

 

最後，小編預祝大家「過三爆四」！