校園Guide

作為一個拖延症JJ，拖到最後1日先溫final完全唔會係一件意外嘅事。不過隨住上嘅course越嚟越難，由以前1001裸考都B到，到而家認真溫都可能只係可以啱啱好低飛pass到，溫書需要嘅時間就變得更多，一個唔小心hea多幾日真係隨時See you again。想考前24小時有效率咁最後衝刺？不如參考下以下3個tips啦！

1. 溫習前做下運動先

每次溫書個腦都唔會一下子function到，要一段時間先run到，老老實實都幾嘥時間，特別係最後衝刺個陣。想個腦快速進入狀態，除咗隊能量飲品外，其實做運動都可以架！只要你係溫習前運動15－20分鐘，大腦就會開始運作，從而改善你溫習嘅效率。另外，運動亦可以令大腦釋放安多芬，舒緩你緊張嘅心情，等你唔洗個心囉囉攣。至於做咩運動好，就視乎返你哋嘅習慣，不過又唔需要太激烈，可能散下步，做少少home workout都可以令到你個腦開著turbo。

 

2. 將重點內容讀出嚟

雖然大聲朗讀呢個行為有啲「小學雞」，但無辦法啦需要記到入腦嘛。根據滑鐵盧大學進行過嘅研究，發現大聲朗讀出內容可以幫助增強對文字內容嘅長期記憶。研究入面分享到最有效嘅記憶方法為大聲朗讀、其次為聽自己錄音、聽人哋錄音，最差係無聲閱讀。如果你唔怕尷尬，或者可以有私人空間溫書嘅話，都強烈建議你可以試下用呢個方法去將啲lecture notes內容記入腦架！

 

3. 收埋電話防止被distract

呢個tips雖然睇落好廢，但確實係最有用嘅tips嚟！現今社會個個都手機不離手，問心個句你係唔係有時碌電話好易分神，明明只係想覆個message，點知就碌咗1個鐘ig／脆，仲要唔記得左手頭上本身做緊啲咩？如果你真係得返所剩無幾嘅時間去搵書嘅話，就強烈建議你暫時收埋手機，放棄袋入面又好、鎖埋佢都好，總之越少機會畀電話distract就得！如果無咩緊急事嘅話，考埋final再算啦，唔好因為一時三刻嘅興奮搞到要retake啦！