校園Guide

話咁快就5月尾，有Intern Offer嘅同學仔應該好快就要開始煙腸生涯，又或者Fresh Grad BB都應該開始搵工成為職場新人，小編好明啱啱返工實會成日撞板，但唔想第一份工就成為公司嘅雷隊友？不如一齊睇吓職場新人返工最常犯嘅錯誤有咩，避免雷到人啦！

 

1.穿著唔得體

啱啱返工，第一印象好緊要，大家對你未必好熟，同事未必同你有太多機會相處，通常佢哋都會以你嘅外觀去猜測你係一個點嘅人，如果男仔著得太求其，踢對涼鞋返工，又或者女仔著得太清涼返公司，同事們見到你嘅衣著可能都會感到尷尬，所以返工建議著得舒服但又唔好過份清涼會比較好！

 

2. 唔認錯仲要重複犯錯

對於職場新鮮人同返緊實習嘅你，唔好怕做錯事，因為犯錯係返每一份工嘅必經階段，而且大家都會預期你會犯錯，最緊要係做錯事之後，你嘅態度同善後工作，有啲人會選擇唔認錯或者將責任推卸喺其他事上，咁係最差嘅做法。勇於承擔自己嘅錯失，及早改正同避免再犯同一樣嘅錯誤，先會比人有承擔同責任感，建議新到一個工作環境，要熟悉果個部門嘅SOP，每次都確實審視交出去嘅資料，就萬無一失啦！

 

3.唔好急住埋堆

初到職場，想快啲熟悉環境同同事打成一片係正常不過嘅心理，但若果太快就進入某個小圈子或小群體，好可能會唔小心企錯邊，而導致之後職場之路比較難行，建議返工幾個月時間，可以多啲參加唔同同事嘅聚餐，同多啲唔同同事食晏，觀察一吓部門風氣及氣氛，再去考慮自己應該身處呢啲圈子嘅咩嘢位置。

 

小總結

1.日常穿著會影響同事間對你嘅第一印象

2.做錯事要虛心道歉及早改正，避免重複犯錯

3.唔好急於埋堆，耐心觀察權衡同事關係

職場上順遂嘅人，通常都有選擇權同具有好強嘅適應力，喺工作上作哋都可以應付一啲不確定因素帶嚟嘅影響，成功同失敗都係喺工作上必然會遇上嘅結果，懷住樂觀坦然嘅心去面對，得失心就唔會咁重，工作上都會順利啲。