校園Guide

成日係Threads見到好多跪友話自己又「沉船」，都會係到諗有冇咁易呀？不過當自己見到身陷「險境」個陣發現其實「沉船」真係好常見嘅事。唔想自己成日失去理智，或者誤以為人哋同你Flirt緊但其實係自己FF，不如等小編教你點樣分辨「真愛」定係「真FF」啦！

 

「沉船」有咩特徵？

「沉船」泛指係拍拖前，自己已經陷入戀愛小劇場，不停幻想對方同你有進一步發展，無限放大對方嘅行動去證明對方對自己有意思，而且已經開始唔理智不能自拔。以前啲人會用「沉船」形容一啲突然對「性伴侶」動真情嘅思想，但由於我哋而家會透過Threads／Youtube等Channel接觸多咗台灣網民，所以「沉船」同台灣用語「暈船」都開始意思相通。以下係其中5個常見嘅「沉船」特徵。

（1）只要收到Crush嘅message，就會忍唔住姣笑，然後無限解讀佢每個字嘅意思。

（2）一見到有關星座／MBTI嘅post，就會第一時間睇下Crush嘅部份，去了解佢多啲

（3）Crush一出Post／Story，就會諗究竟係唔係講緊自己，瘋狂對號入座

（4）只要Crush已讀不回你，就會係咁諗自己做錯啲咩

（5）碌到得意嘅reels／post都會想share比佢，或者覺得好啱佢

 

以上5條你中左幾多呢？如果中晒就真係恭喜你成為「沉船仔」嘅一員。「沉船」其實冇問題，不過都要學識分究竟係「真愛」定係「假桃花」。今日你click得入嚟睇呢篇文代表你都仲想清醒，咁不如小編醒你3個方法等你分辨一下究竟你個Crush其實係唔係真係同你Flirt緊，定你FF太多？

（1）Hea覆試下對方反應

如果你忍到手嘅話，會建議你試下唔好每次收到message就秒回或者會千字文，試下Hea下對方睇下佢有咩反應，或者會唔會追問落去。如果佢無反應或者已讀不回的話，就代表對方可能唔係特別在意你嘅說話。

（2）比較下佢識你之前／之後嘅post

好多人都會覺得個crush對自己特別好，用詞唔同啲emoji又打多幾個，咁不如去睇下佢識你之前出嘅post／story，睇下有無唔同，去證明自己係唔係真係與眾不同啦！

（3）聽下朋友意見

好多「沉船仔」都會因為太沉而忽略身邊人嘅意見，如果想清醒少少，最好嘅方法係問下朋友嘅睇法，探討下究竟係自己諗太多定個crush真係flirt緊你啦！