校園Guide

好多大學生都會覺得大學生活四年入邊，只要努力讀書爆GPA，然後喺Final year嘅時候搵份好intern，份CV就會夠靚幫到你搵份高薪厚職。但係其實除咗爆GPA同埋返intern外，仲有好多嘢都可以令到你份CV變得靚靚仔仔架！今次我哋介紹幾樣大專學生可以喺year 1/2嘅時候可以做嘅事！趁未有咁大壓力嘅時候裝備自己，咁到Final year嘅時候就可以舒舒服服咁chur FYP啦!

 

（1）舉辦學生活動

Year 1/2嘅時候最多人會考慮嘅事就係「上莊」，因為上莊嘅時候會有好多機會搞活動同識好多人，咁樣可以培養到自己嘅團體合作能力同其他軟性技能。不過好多人都會驚上莊會有好多不必要嘅應酬，好嘥時間同精力。咁嘅話不妨考慮一下做OC或者Committee去舉辦一啲大型活動（例如院慶／Annual Performance／Singcon etc）。只係花你幾個月嘅時間，但係都有機會學到好多唔同嘅嘢，同埋識到唔同senior／老鬼，對將來都有用㗎！

 

（2）參加工作坊或者講座

另外會建議大家可以參加一下學校舉辦嘅工作坊或者講座。好多時學校唔同嘅部門都會搞唔同類型嘅免費活動比學生可以增長知識，同埋最緊要係參加呢啲活動可以識到唔同嘅人，從而建立關係。呢樣嘢算係比較低成本嘅活動！甚至有好多同學可以透過參加唔同嘅工作坊去搵到自己嘅興趣，長遠嚟講都好有用㗎！

 

（3）參加義工服務

仲有一樣都幾多人會考慮嘅就係去參加義工服務，例如玩吓Aiesec或者扶輪社舉辦嘅活動。同學唔單止可以喺香港到服務到其他人，甚至可以出國去見識一下。比起去exchange或者去海外intern，相對上冇咁大競爭，而且可以冇咁大壓力之下去提升自己嘅技能，之後寫落CV度都好吃香㗎！

 

今次介紹咗三個比year 1／2嘅同學刷CV嘅活動，下次就會介紹其他適合Year 3/4嘅活動！