校園Guide

新一年想見識多啲，唔想下下屈係屋企，但係又唔係好多budget去旅行的話，不如發掘一下香港唔同嘅隱世景點啦！今次小編介紹以下4個本地特色Chill點比大家bookmark定，今年仲有12個月淨，想挑戰晒都無難度啦！

 

1.)大澳

相信好多人都聽過大澳，但真正去過嘅人有幾多呢？大澳係位於大嶼山西南部嘅漁村，同好多景點唔同，大澳依然係有好多人住好熱鬧嘅地方，除咗可以見到傳統嘅木屋，仲有好多特色海產可以買嚟當「手信」。另外，大澳最近仲化身成壁畫小島，島上多個角落都畫上特色壁畫，等大家可以打卡！想再特別啲，仲可以坐原居民開嘅小船參觀大澳棚屋同睇中華白海豚，價錢只係$25至$30架咋！

至於去大澳嘅交通其實都尚算方便可以去東涌站轉乘巴士（如11號巴士）直達大澳，車程約30分鐘。或者從中環碼頭乘坐渡輪前往大澳，渡輪的航程約為50分鐘。

 

2.) 坪洲

雖然近年多咗人去坪洲，但係其實比起其他離島嚟講坪洲唔算係一個熱門嘅地方，所以相對上都比較好多慢活嘅元素。坪洲以前係一個工業嘅地方，所以佢哋有好多店舖或者建築物都係仲有以前古色古香嘅工業元素，好適合打卡同觀光。另外，坪洲裏面仲有好多文青必去嘅Cafe、賣手藝嘅店舖，甚至係離島必會有嘅海灘。

至於去坪洲嘅交通其實都尚算方便可以去到中環6號碼頭乘搭渡輪（約30－40分鐘），或者由愉景灣出發坐街渡（約10分鐘）。就咁花一日去個本地遊其實都係一個唔錯嘅選擇！

3.)綠蛋島

位於西貢清水灣以東嘅爛排又名「綠蛋島」，因為好似一隻荷包蛋，而島嘅正中央種有綠色植物，就好似一個綠色嘅蛋黃。綠蛋島出名水質清澈，甚至可以清澈見底，所以人稱港版「馬爾代夫」。近年因為多咗人中意水上活動，所以唔少人都會去綠蛋島玩獨木舟、浮潛及直立板到島上觀光。

去綠蛋島嘅話可以選擇由陸路或者水路過去。選擇陸路嘅話可以坐巴士、揸車或者行去。至於水路的話，好多人就會選擇喺相思灣度坐獨木舟或者直立版過去，或者喺西貢碼頭搵船家過去（好彩嘅話仲可以食到由西貢船家燒嘅大雞髀）。

4.) 鹽田梓

至於另一個介紹嘅隱世景點相對上就少人聽過，就係位於西貢嘅離島叫做鹽田梓。喺以前島上嘅村民都係以曬鹽維生，所以就咁樣命名。不過因為依家居民都陸續外遷，所以呢個地方喺2000年後開始有復興嘅社區運動，仲得到聯合國教科文組織嘅獎。至於鹽田梓有咩特色，除咗會有鹽田喺度之外，島上仲有宗教特色嘅建築物，同埋紅樹林等大自然風景。如果你係鍾意睇大自然景色，又想遠離市區嘅話，可以諗吓去鹽田梓㗎！

交通的話，其實都唔算好複雜，只要搭巴士去到西貢碼頭就可以乘坐街渡過去，而且仲會有一日遊嘅tour可以選擇，不過留意街渡嘅船期，因為船期都比較疏，所以記得留意時間。