校園Guide

Midterm完咗仲有一個月多啲左右就考試，啲project都差唔多要埋尾，你個組嘅freerider係咪仍然唔見蹤影呢？唔想做聖母carry晒呢班垃圾，點算好？

一﹑滿載溫馨嘅感化路線
每個freerider都有佢嘅苦衷，明嘅，俾多次機會，苦口婆心私chat輔導下佢。同佢傾下發生咩事，要點做，睇下有冇嘢幫到佢。可能傾多兩傾，佢迷途知返，爆seed交貨呢。「其實我哋真係好需要你。」「一個都不能少！」「有咩困難都好，只要一齊做實搞得掂。」

二﹑釋出頹氣
遇到freerider時切記冷靜，最忌心浮氣躁。多數freerider只係想搭順風車，唔付出拎好grade，唔係真係想同歸於盡。如果佢知你做嘢，實坐定粒6，un un腳等present嗰日開show。所以你要扮到要幾頹有幾頹，絕對唔好俾佢知你有做嘢，等佢feel到唔對路，自己上水作出貢獻。

三﹑大大力Hi醒佢
個個msg都藍剔，再咁落去自己嬲到爆體而亡，忍無可忍無須再忍，既然都死，咁梗係自己心裏暢快最緊要。一於一氣呵成係各大社交平台直接鬧x佢，將你對freerider嘅痛恨心裏嘅憤怒通通發洩出嚟。佢一係良心發現，一係惱羞成怒開拖leave group，一係繼續石沉大海杳無音信，對你都冇壞處吖。

四﹑一刀了斷
直接啲，最後一刻係name list/ppt/paper刪咗佢個名，神不知鬼不覺，到present/派grade大家就知咩事。係有啲衰架啦，但唔諗下佢做咗啲咩先？

五﹑做二五仔報寸
雖然professor貴人事忙，但搵佢哋通常都有用，會象徵式扣下分或俾你完全踢走佢，俾professor知有呢件事自己心理都平衡啲。告狀時唔好一味嬲爆爆數落freerider，成個怨婦咁，應該將重心放係自己有幾慘，用冷靜又帶些少無奈﹑失望﹑無助嘅語氣挑起professor嘅同情心，等佢做番啲實際行動。

延伸閱讀:

大學Group mate圖鑑 — 出嚟啦，Group Project Freerider走走走！

【大學生活迷思一】讀大學的意義

【大學生活迷思二】住Hall生活

【大學生活迷思三】上莊教曉我的事

解釋上莊全術語 — Con Day咩意思？