校園Guide

嚟緊仲有唔同假期，係時候又要同朋友聚一聚。上次就介紹咗五款本地手工啤比大家，今日就等我地介紹埋其他品牌啦。

吹啤啤

Hong Kong Whistle 吹啤啤，呢個本地手工啤酒品牌喺2016年創立。位於荃灣工廈嘅廠房，每個月可以釀製7000枝手工啤，而吹啤啤多款產品都係以充滿本土特色同埋趣味性。例如早前推出過嘅單眼佬話梅蜂蜜酒，釀酒師加入咗話梅，令到啤酒結合甜、酸、鹹味，入口鹹濕。而包裝仲搵到配合鹹濕形象，係《整蠱專家》入面賣「淫賤不能移」迷藥嘅「單眼佬」曹查理。鐘意新鮮口味嘅你，不妨試一試呢個品牌嘅手工啤啦。

麥子啤酒

由三位男士喺2015年創辦嘅本地手工啤酒品牌「麥子啤酒」，以100%全人手釀造純麥手工啤酒，呢個品牌並唔係用本土情懷作為賣點，反而係有好多特色口味等緊你去發掘。而近期仲推出「豬朱古啤酒 Chocolate Brown Ale」，釀酒師特別加入咗椰子，令到啤酒有更多層次。

門神啤酒

門神啤酒係喺2014年創立，Laszlo同Michele受到中國民間習俗吸引，相傳門神有招運同埋辟邪嘅作用，而每一對都會有獨特造型同傳說。當時佢地覺得香港缺乏有香港特色嘅本土啤酒，所以就決定創辦呢個品牌。門神手工啤酒以水、麥、酒花、酵母全天然原料，經過四星期發酵而成。之前推出過嘅「龍王福建柚子啤」都好受歡迎，陣陣柑果味同花香，令人感覺清新。

少爺啤酒

Young Master少爺啤酒成立喺2013年，由印度籍嘅香港人Rohit Dugar創辦。呢個品牌嘅手工啤會推出好多新奇而且創新嘅味道。曾經推出過嘅「黑無常」帶有朱古力、可可、咖啡同辣椒味道，幾種味道集合於一身，呢枝手工啤喺亞洲拎到好多獎㗎。

大圍啤

大圍啤係由兩位創辦人Henry同Wendy共同經營，主打以西式茶葉釀製手工啤酒，因為其中一位創辦人係自細就喺大圍到成長，所以對呢個地方好有情意結，大圍啤呢個名就係咁嚟㗎啦。而佢地曾經推出嘅系列「壹」、「貳」、「叄」、「肆」、「伍」，令到大家都開始接受同鐘意茶味手工啤。