校園Guide

失戀好似係人生嘅必經之路,正所謂「愛不夠愛你的人才受罪」！但點解人哋咁快行得翻出嚟，而自己卻好似跌左入漩渦咁… 可能係你未用啱方法姐，小編今日就收集咗失戀後必做嘅6件事，希望可以幫到大家快啲走出陰霾！！

 

1.認清事實，唔好再搵藉口

張曼玉講過，兩個人最後無一齊的原因，就係因為唔夠愛。好多人分手之後，下意識都會比好多假希望自己，覺得對方肯定仲係愛自己，但記住既然對方選擇咗放棄就代表佢唔值得你嘅繼續堅持。小編知道要承認對方已經唔再愛自己係一件好難好殘忍嘅事，但就好似水泡咁，你一日唔挑穿佢，你嘅傷口一日都唔會埋口。

2.情緒發洩

無論係搵朋友傾訴又好，攬住紙巾盒大喊大叫又好，盡情發洩出來啦。唔好催眠自己／身邊嘅人自己「還好」啦，容許自己無那麼堅強吧。令自己忙啲，無論係寄情工作定係無限做運動，用健康嘅方式發洩情緒，將淚水化為汗水，Be a better you！

3.寫失戀日記

一段戀情嘅結束唔會抹殺佢曾經嘅真實同美好，將分手嘅經過同原因寫低，用文字抒發自己對於呢段感情嘅感受，平靜哋放低。而你要知道你生活除了失戀以外仲有好多重要嘅人同事！將自己生活中嘅其他領域同事件帶入來對於你走出陰霾都係有幫助的，將生活焦點轉移，唔好淨係放喺失戀呢件小事上面。

4.處理曬嗰啲會令你觸景傷情嘅物品／資訊

睹物思人呢件事係真嘅，可能係電話入面一張一張嘅合照，可能係衣櫃入面嗰件情侶衫；好容易會將你重新勾翻入以往嘅感情漩渦。眼不見為淨，前任送嘅嘢或者係社交媒體上面關於兩個人嘅貼文都好，可以唔捨得dum，但最好將佢收埋喺一個大家都睇唔到嘅地方啦。想要重新開始新生活，不如擦乾眼淚做次失戀斷捨離，淨係留低啲最值得同最適合自己嘅嘢。

5.每日搵個新目標比自己

失戀後，屬於自己嘅時間時間變多咗，平時要陪伴侶的時間空咗出來，不如嘗試一點新挑戰，令自己嘅生活變得更充實啦。用一啲自己一直想做好耐嘅事取代咗以往嘅拍拖時間，都係一個走出陰霾嘅好方法！例如小編當年失戀之後就走咗去跳Bungee Jump，跳落去嗰下嘅刺激感將失落感徹底淹沒。發掘一啲新興趣，創造一啲小成就，會令你知道就算自己一個都可以堅強勇敢哋面對生活。

6.盡情享受單身嘅樂趣

分手意味住嘅係由原本兩個人嘅生活，變翻一個人嘅生活。在呢個過程入面，我哋會害怕轉變，害怕孤獨，因種種嘅不習慣而覺得恐懼。但係成長總需要一啲獨處嘅時間，「一個人原來都可以盡興」，享受一個人嘅生活，例如去個小小嘅旅行，你會發現其實世界比你想像中大。整理好自己，重新出發！可能你嘅幸福已經悄悄來臨。

願大家早日走出情傷，做翻嗰個容光煥發、光芒四射嘅自己～