校園Guide

成為「渣男磁石」應該係好多女仔嘅噩夢，見到身邊有啲朋友被渣男害到心碎，有啲卻係「渣男絕緣體」，究竟有咩秘訣呢？今日小編就整理咗5個小tips，同大家一齊趕走身邊嘅渣男！！！

 

1.唔好做「聖母瑪麗亞」

睇過好多戲／現實中遭遇渣男嘅朋友仔，佢哋都有一個不約而同嘅共同點，就是戀愛嘅原則同埋底線模糊不清，對渣男嘅行為過於寬容！例如被家暴或者被出軌，只要對方扮可憐或者許埋啲虛無飄渺嘅承諾就會原諒佢，然後令悲劇重複。要知道雖然人人都有被原諒的機會，但過份聖母心只會害死自己。

2.唔好將愛情作為你唯一嘅寄託

好多人喺戀愛嘅時候都會被衝昏頭腦，認為對方好似就係自己生命嘅全部。為咗對方可以放棄所有嘢，卻因此迷失咗自己，成為對方嘅附屬品。咁樣只會令渣男覺得你唔值得珍惜，對愛情有嚮往唔係一個錯誤，但係「要愛人先要愛自己」，一個人只有喺識得愛自己之後，先不會喺愛情入面迷失自我。

3.保持獨立，不輕易被誘惑

有好多渣男會鍾意用奢侈品／金錢等物質來誘惑女生，覺得「有錢真係大曬！」。所以如果女仔保持獨立，自己就買得起想要嘅嘢。喺不被誘惑的情況下得到嘅愛情可能會比較單純同純粹喔，而對方亦都不會將你當成膚淺嘅女仔，可能會更比心機對待你。

4.對未來伴侶設立一段觀察期

一見鍾情聽落好似係一件好浪漫嘅事，但曖昧嘅費洛蒙其實好容易會蒙蔽你嘅雙眼。喺每一段關係入面，人類會習慣性透過話語／外在打理嚟美化自己，所以喺相處過程入面，多啲觀察佢嘅言行係咪一致，咁就可以減少遇到渣男嘅機會啦。

5.要識得「及時止蝕」

投入左感情之後，好多人就算發現問題都會因為唔捨得而遲遲唔肯放手，我知呢個係人之常情。但其實不斷嘅忍讓未必會換來感動／悔改，再鍾意對方，都唔應該對對方太包容，尤其有啲事唔係當無發生就可以淡然過去。離開或者不易，但止蝕離場，總比委屈求全，失去自己來得好喔。

ps.學識成熟地為自己設想，世界上仲有好多好男仔，為咗一棵爛樹放棄整個森林？唔值唔值～