校園Guide

「我能習慣遠距離，愛總是身不由己」，Long D情侶一向被視為最容易分手的一群人，特別係疫情肆虐下，好多跨境戀人忍受唔住相思之苦而分開，但有好多情侶唔單止維持到感情仲加深咗！原來佢哋都係靠呢啲小tips，正經歷異地戀嘅大家快啲借鑑下啦。

 

1.共同制定戀愛原則／規定

有研究顯示70%無為關係設定原則，或者處理變化嘅異地夫妻係半年內分開，可見戀愛原則嘅重要性。但每個人對於男女關係嘅原則定義都有唔同，所以異地情侶們應該係一開始就要釐清自己嘅底線同埋誠實哋話比伴侶聽自己對於關係嘅需求，然後共同制定雙方都接受嘅規定例如：同異性社交要話比伴侶知，唔可以與其他人有曖昧關係，三個月要見一面等等。

2.信任最重要

每一段關係入面，忠誠都係好重要嘅，而信任伴侶亦都係每對異地情侶要面對嘅課題。因為距離加上少見面，好容易會令人無安全感。特別係有時差問題嘅情侶，每日有好長一段時間都搵唔到對方，日積月累好容易會令人胡思亂想。係呢個時候雙方絕對嘅自覺同埋信任就最為重要，既然選擇咗同對方一齊，就應該更加信任對方嘅為人喔～

3.驚喜製造不可少

受距離限制，好多事就算大時大節Long D情侶都無得見面慶祝，但驚喜不能少。就算唔可以次次都偷偷地買張機票飛去同對方一齊過節，提早預備定禮物寄比伴侶／親手寫張心意卡比對方都可以一齊享受節日的美好。即使係通過網購形式，遙距幫對方叫份外賣都可以好Sweet!

4.傾訴自己真實感受

Long D情侶見面時間少之又少，所以真誠溝通絕對唔少得！鬧交嘅時候無得用一個擁抱解決，對方唔開心亦無得親身安慰，對感情真係好大衝擊。所以喺線上交流嘅時候多啲表達自己嘅愛意係好重要！有咩唔開心／嬲都唔好選擇冷戰嘅方式嚟處理，清楚話比對方知自己點諗先係維持感情嘅最佳途徑。

5.一齊計畫未來

有正面嘅期許喺雙方對於異地感情維繫一個重要因素，唔單止係大家一齊向住未來可以共同生活嘅目標一齊努力又好，又或者係單純地一齊計畫下次見面嘅時間／行程都好。只要情侶雙方都會「保持對見面的期待！」，將對方擺落自己未來嘅人生計畫入面，會令大家對於呢段感情又更加多嘅信心同埋安全感喔！

6.雙方都要有自己嘅生活

異地戀嘅人，長時間伴侶都陪伴唔到自己嘅日常生活。望住身邊嘅朋友一雙雙一對對哋甜蜜約會，而自己只可以同電話交流其實真係好容易會感到寂寞。所以培養自己嘅興趣，建立自己嘅生活圈子非常重要，就算伴侶唔係身邊都要好好照顧自己先可以令對方安心。而且擁有屬於自己嘅時間，做到唔過份依賴對方但又唔忽略對方對於感情發展好有幫助。

7.訂立情侶專屬時間

對於遠距離情侶來說，要維持感情必須比一般情侶多花心思同時間。雖然唔可以係現實見面，但而家網絡盛行，online見面已經再唔係難事。每對情侶固定嘅拍拖時間，Long D情侶一樣唔可以忽略！即使只係開住個cam陪住對方做自己嘢／每晚訓前都打電話同對方講早抖都好。點都要預留一啲時間陪伴對方喔，怕悶嘅亦都可以搵啲線上活動一齊做，例如一齊睇Netflix,一齊打機等等……

8.相處多啲「儀式感」

好嘅愛情需要儀式感來增溫，而對於異地的情侶來講，儀式感更加重要。即使身處嘅地方相隔幾千公里、時差。情侶之間都可以花多啲心思做唔同嘅舉動來取悅對方／共同建立美好回憶。小編早兩日睇到一條片，叫《時差戀人》，一對異地情人做咗一個”Half&Half”計劃——將各自影嘅照片拼接在一起，拼出屬於他們的”零距離”。而當有見面機會嘅時候亦可以花多啲心思計畫難得嘅約會！

ps.祝福世上有情人終成眷屬，無論伴侶係唔係自己身邊，都可以甜蜜哋戀愛～