校園Guide

新一年到啦，唔知大家有無一個斷捨離清單比自己呢？無嘅話可以回顧往年我地寫嘅文：【新年新開始】 2020年大學生斷捨離清單！

近年愈嚟愈多人推崇斷捨離嘅生活，唔單止係新年去舊迎新，而且重將哩個理念貫設係生活當中，亦都有人會想保持簡單輕鬆嘅生活而追求極簡主義，但其實極簡主義究竟啱唔啱你？今日想同大家分享三個原則去睇睇究竟極簡主義生活啱唔啱你。

 

1/ 斷捨離物品令你輕鬆而非後悔

成日睇YouTube都會見到有好多唔同嘅YouTuber去分享佢哋嘅生活，有一啲係極簡主義者。喺香港呢個寸金尺土嘅地方，見到人哋可以捨棄身邊咁多嘢，換嚟輕鬆嘅生活，有時都會令到我哋有啲羨慕，甚至想成為同佢一樣嘅極簡主義者。但當你開始實行嘅時候有冇發現，你想追求嘅生活同佢想追求嘅生活未必一樣。如果你開始捨棄你嘅物品，但係你並冇因為咁樣覺得輕鬆開心，反而係覺得好後悔，咁你可能要重新審視呢一啲物件對你嘅意義，同埋你係咪真係為咗追求你嘅生活而去做呢一個行為呢？定係純粹為咗潮流而去盲目跟隨哩個行為？

 

2/ 活在當下，非活在過去或未來

係斷捨離嘅時候我哋可能會諗好多嘢，例如我究竟需唔需要呢一樣野，呢一樣嘢對我有冇用處，呢一樣嘢曾經對我有非常之深刻嘅回憶，我應唔應該捨棄？但其實，極簡主義講求嘅係希望大家可以活在當下，審視呢一刻對你重要嘅嘢。可能有一啲舊嘅卡片你會一直保存住好多年，但嗰一啲嘅回憶都已經成為過去，當你真正做斷捨離嘅時候，你再重新睇返，你會感謝當初嘅自己，亦都會對呢一份回憶心存感激。但最終你做唔做到捨棄對當下無意義嘅物品，放低物質對自己嘅意義，留意自己當下嘅真正需要？

 

3/ 真正令你感到快樂

最後一個原則，亦都係最重要嘅原則，就係呢一種嘅生活真係令到你真正覺得開心。入到大學之後你可能對以後嘅生活有更加多嘅憧憬，係你斷捨離嘅過程入面有冇真正搵到自己想過嘅生活呢？如果有覺得極簡主義嘅生活係適合你，之後亦都可以向呢個目標繼續出發。相反，如果你覺得呢一種生活並唔係你想要嘅，至少你知道自己唔想要啲咩。

 

人其實並唔需要用物品證明自己嘅存在，放低先係真正嘅富有。希望你都會搵到自己想要嘅生活！