校園Guide

有時見到身邊啲frd唔開心／放負，體貼的你都會走去安慰下佢哋。但原來有啲自以為安撫嘅行為，可能會令傾訴者越聽越嬲，唔想好心做壞事？以下幾類說話就記住要避開啦！

 

1.同對方鬥慘

有好多時候，喺朋友同你講自己嘅難處／傷心嘅時候，好多人都會不自覺哋以自己／其他人嘅例子嚟做比較，跟住同對方講 eg.你唔算最慘啦，你睇我／人哋仲慘啦，但其實呢類型嘅說話會令人變得封閉，要知道每個人都有自己獨特嘅難處，唔好輕易做比較，只要認真傾聽就好～

2.批判對方狀態

有時朋友傾訴嘅時候，你會希望佢可以更加積極哋面對，呢件事嘅出發點本身係好事嚟，但喺朋友傾訴嘅時候，盡量唔好以「唔好放負啦」／「開心啲啦」等等嘅話語嚟安慰比較好，咁樣會令朋友感到被嫌棄，從而更加壓抑及封閉自己嘅情緒。

3.比好多建議／評論

好多時，我哋安慰人嘅時候都會不自覺咁對事件作出評論同建議，可能講出嚟好正面好積極，例如安慰考得差個同學下次再努力啲，但對方可能已經盡曬力。呢啲安慰嘅話語雖然係出自真心，但聽者嗰一刻可能未必需要呢樣嘢，出到嚟嘅效果就變到好似風涼話一樣咁難聽。

4.成日反客為主

小編知道作為繁忙嘅都市人，「你有壓力時我都有壓力」。但係朋友訴說自己嘅壓力時，唔好成日以「我都係啊」，然後反向訴說自己嘅壓力。咁樣朋友無得到有效嘅安慰，可能仲要翻轉頭安慰翻你，一次半次可能還好，長久下去只會令友人反感。

5.對事情不以為然

感受係無對錯嘅，可能對方傾訴嘅只是事實的部分令你會覺得佢以偏概全／Over React。不自覺地會以「都係咁姐」、「其實只係好小事」等等嘅說話否定他們的重要性。但咁樣會令對方好容易鑽牛角尖，產生自己嘅傾訴好多余嘅負面情緒。

ps.其實小編覺得只要靜靜哋聆聽、陪伴已經係最好嘅安慰嚟，希望大家都可以重拾笑顏～